Masbateño news: Task force kontra PAGs sa Masbate pumuntos sa guihapon

By Rogelio Lazaro

Friday 27th of July 2012

SIYUDAD SAN MASBATE, Hulyo 27 (PIA) -- Isad na pumuluyo na munisipyo san Aroroy an nadugang sa naga damo na munero san mga sibilyan na naaresto kag naplantaran san kaso sa probinsiya san Masbate maylabot sa pagtatago san mga armas.

An nagapangatubang sugad san kasong illegal possession of firearms and ammunitions pakatapos na madiskubre an isad na arsenal sa iya balay nagangaran Charlie P. Cortes, residente san Barangay Manamok, munisipyo san Aroroy.

Nakumpiskar san grupo san mga pulis sa balay san suspek an isad na Garrand rifle, duha na kalibre .45 pistola, isad na homemade shotgun, kag isad na shotgun shell.

Apwera sani, nakumpiskar man an isad na rifle scope, magazines kag damo na bala.

Segun kan PNP Provincial Director Heriberto Olitoquit, an pagsalakay guin hiwat san Special Task Force Masbate (STF) banda ala sais san aga san nakaligad na Miyerkules sa gahom san isad na search warrant na guin isyu san korte sa Masbate.

An suspek kaupod daw sa listahan san mga sibilyan na nagatago san arsenals kag naga trabaho sa private armed groups (PAGs) na target san STF na rumpagon antes an kampanya sa 2012 local elections.

Segun sa mga otoridad, ang PAGs an guina basol sa siyam na insidente san saramok san 2012 local elections kag padayon ini na banta sa isad na selinsiyo, matuninong, kag honesto na pirilian sa maabot na Mayo. (RAL)