Masbateño news: Dili ordinary na pagahanap san child-friendly barangay guin hiwat sa Masbate

By Rogelio Lazaro

Thursday 5th of July 2012

SIYUDAD SAN MASBATE, Hulyo 5 (PIA) -- Guin tunaan kahapon sa siyudad san Masbate an pagahanap san barangay na kikilalahon bilang most child-friendly na kun-diin trangkilo an istaran san mga bata.

Tanan na kapitanes kag konsehal san 30 na barangay san siyudad nagtambong sa launching ceremonies na kun-diin sinda tanan nagpirma sa promisa na tutumanon san kada lokal na institusyon an inda papel na maabot an guina maw-ot na magin child-friendly an inda mga barangay.

An gobyerno lungsod san Masbate kag church-based kag charity group na Caritas an naga panguna sa proyekto kag mismo sinda Masbate City Mayor Socrates Tuason kag Caritas program director, Rev. Fr. Leo Casas an namuno sa okasyon.

Segun kan social welfare officer Edna Jasul, an most child-friendly barangay paga rekognisaron sa Oktube bilang kaparte sa selebrasyon san Children’s Month.

Agod masukit an honor, kinahanglan na mariyalisar sa barangay an dili basta-basta na patakaran, segun pa kan Jasul.

Upat an dapat na masunod na rikisito’s ini an: tanan na pamilya igwa san access sa supiyente na suplay san malinis na inuman na tubig; an mga kabataan na may edad 3 anyos pa-17 anyos naga iriskwela; may functional na violence against women and children’s desk an barangay; kag kinahanglan an partisipasyon san kabataan sa pagpaplano kag implementasyon san mga proyekto sa barangay.

Segun pa kan Jasul, kung sugad himuon an paggrado sa barangay sa scale na 1-10 kag 10 an pinaka-child friendly, kadamuan sa mga barangay nasa pang-duha o pang-tulo na level.

Damo an kinahanglan na hihimuon sa barangay agod kilalahon na child-friendly, dagdag pa ni Jasul. (MAL/RAL-PIA Masbate)