Masbateño news: Lalaki na nadakpan san pampaputok kag high-powered firearms na guina tuodan na gagamiton sa eleksyon sa Masbate, napreso na

By Rogelio Lazaro

Monday 2nd of July 2012

SIYUDAD SAN MASBATE, Hulyo 2 (PIA) –- Sa sulod san karsel magapalipas sa paabuton na election season an isad na lalaki na guina dudahan na miyembro san armed group san magkapira na pulitiko sa probinsiya san Masbate.

Guina laom na irog sani ang tuyo sa 56 anyos na si Jose Siopon san makuhaan ini san pampaputok kag high-powered firearms sa iya balay sa Barangay Ayat, munisipyo san Mandaon san nakaligad na Miyerkules.

Segun sa spokesman san Masbate Provincial Police Office na si Senior Inspector Lope Badillo, upat na improvised explosive devices, M16 rifle, carbine rifle, airgun kag mga bala para sa mga nasambit na mga kalibre san badil an nakuha san Task Force Masbate na sumalakay kag nagserbi san search warrant sa balay ni Siopon banda alas-3 san aga san nasambit man na adlaw.

Segun kan Task Force Masbate commander Senior Supt. Felix Servita, sesesegon ninda an mga nagatago san loose firearms kag mga private armed group bilang preparasyon san Philippine National Police sa pirilian sa Mayo 2013.

An mga armado san loose firearms sa Masbate an nakaulang sa paghiwat san honest, orderly and peaceful election sa probinsiya sa Mayo, segun pa kan Servita.

Dahilan san halaba na istorya san kasamok sa pulitika, an Masbate guina konsiderar san PNP bilang “hot spot” kun tiyempo san eleksyon. (RAL)