Masbateño News: Internet Cafés bantay sarado san BCPC sa Masbate

By Rogelio Lazaro

Thursday 7th of June 2012

SIYUDAD SAN MASBATE, Hunyo 7 (PIA) -- Guin hugotan sa siyudad san Masbate an regulasyon sa mga Internet Cafés tuna sa primero na adlaw san klase kahapon.

An paghihigpit una na guin paabot sa operators san Internet Cafés san an mga ini ipatawag sa tiripon san Barangay Council for the Protection of Children na guin hiwat pira kaadlaw antes mag-abre an mga iskwelahan.

Nag-paandam an mga Barangay Council for the Protection of Children na dili ninda tutugutan na mautro pa an bayolasyon san magkapira na operators sa sobra sa 50 na Internet Cafés sa regulasyon na kawsa san patung-patung na reklamo hali sa mga guinikanan san mga estudyante.

Susog sa reklamo, naga palta an mga mag-aadal sa inda mga klase dahilan san pagkaharing san mga ini sa on-line games sa Internet Cafés.

Segun sa mga punong barangay kag City Social Welfare Office, inda paga panabaton an operators na magtugot sa estudyante na magsulod sa inda Internet Cafés na tiyempo san klase.

Base sa ordinansa san siyudad, off-limits an mga estudyante sa Internet Cafés sa adlaw na may sulod kay an mga kanam na on-line naka-ulang daw sa inda pag-aadal. (MAL/RAL-PIA5 Masbate)