Bikol news: Matrayumpong serye nin operasyon kontra sa illegal logging nanotaran

By Marlon A. Loterte

Monday 13th of August 2012

SIYUDAD KAN LEGAZPI, Agosto 13 (PIA) -- Sunod-sunod na matrayumpong operasyon kontra sa illegal logging an naisagibo kan Department of Environment and Natural Resources (DENR) sa rehiyon nin Bicol sa paagi kan mga field offices kaini sa apat na probinsiya kan rehiyon.

ZMaabot sa 14,306 board feet (bd. ft.) nin lumber saka 49 sako nin oring an nakumpiskar sa magkakasunod na operasyon katakod kan mas pinakusog na kampanya kontra sa iligal na pagputol nin kahoy sa mga kabubuldan sa rehiyon.

Sosog sa impormasyon, an sunod-sunod na operasyon kan DENR 5 katuwang an Philippine National Police (PNP) sagkod Armed Forces of the Philippines (AFP) nangyari sa Baleno, buda Masbate city, Masbate; nagkapirang banwaan sa probinsiya nin Sorsogon; Caramoran saka Virac, Catanduanes; Mercedes, Camarines Norte dangan Lupi, Camarines Sur.

Sa kabilogan na bilang kan kumpiskadong kahoy, an pinakadakulang dakop iyo an sa operasyon na nangyari kan hunyo 18, 2012 sa brgy. gangao, baleno kun saen may 4,669 bd. ft. nin lumber an nakua.

Enot kaini, ipinag-orden ni DENR 5 regional executive director Gilbert Gonzales an mahigot asin mas pinakusog na kampanya sa “forest protection and law enforcement” tanganing mapuho an iligal na pagputol nin kahoy sagkod pag-ooring sa mga kabubuldan. (MAL-PIA5/DENR)