Tagalog news: Provincial Fisherfolk Summit, isasabay sa Baragatan Festival

By Orlan C. Jabagat

Thursday 7th of June 2012

PUERTO PRINCESA CITY, Palawan, Hunyo 7 (PIA) -- Nakatakdang isagawa sa lalawigan ang Provincial Fisherfolk Summit sa Hunyo 18-19 na kasabay ng pagdiriwang ng Baragatan sa Palawan Festival.

Ito ay isasagawa sa Victoriano J. Rodriguez Multipurpose Hall ng gusaling Kapitolyo at pangangasiwaan ng Office of the Provincial Agriculturist (OPA).

Inaasahan ang presensiya ng 200 na mga partisipante mula sa iba’t-ibang munisipyo ng lalawigan na kinabibilangan ng mga Municipal Agriculture Officers; MFARMC (Municipal Fisheries and Aquatic Resource Management Council) Chairperson; Sangguniang Bayan Member na tumatayong Chairman ng Committee on Agriculture & Fisheries; Municipal Fisheries Technician; commercial fishing boat operators at seaweed farmers.

Ayon kay Edgardo Zabala Jr., aquaculturist II ng OPA, layunin ng naturang pagpupulong na makapaghalal ng bagong tatayong Provincial Fisherfolk Representative ng Palawan kung kaya’t magkakaroon ng eleksiyon ang mga MFARMCs.

Ang summit ay nakatuon sa programang pangisdaan at ilan sa mga tatalakayin dito ay ang mga updates sa FARMC gayundin sa commercial fishing boat operations; livelihood opportunities; seaweed farming at involvement sa coastal resource management ng mga kooperatiba sa fisheries program.

Magsisilbing speakers ang mga kinatawan mula sa Bureau of Fisheries and Aquatic Resources (BFAR), OPA at Shemberg Company.

Sa pagpupulong din igagawad ang Certificate of Recognition para sa mga Model FARMC; Municipal Agriculturist; Fisherfolk Cooperative o Association; Municipal Fishery technician at Provincial Agricultural coordinator. (PIO/OCJ/LBR/PIA4B-Palawan)