10,000 trabaho i-aalok sa mga Labor Day job fairs sa Gitnang Luzon

By Carlo Lorenzo J. Datu

Monday 30th of April 2012

LUNGSOD NG SAN FERNANDO, Pampanga, Abril 30 (PIA) -- Nasa humigit kumulang 10,000 local at overseas careers sa business process outsourcing, retail, service, at manufacturing industries ang i-aalok sa 110th Labor Day job fairs sa Gitnang Luzon.

Ang mga naturang employment fests, na nakaangkla sa temang, “Pagtutulungan.Pagbabago.Disenteng Trabaho” ay sabay-sabay na idaraos sa People’s Center sa lungsod ng Balanga; Camp Servillano Aquino sa lungsod ng Tarlac; Provincial Capitol Compound sa lungsod ng Cabanatuan; Provincial Capitol Grounds sa Iba, Zambales; at mga event center ng mga SM Malls sa Marilao; Baliwag; Pampanga; Clark; Tarlac; at Olongapo.

Ayon kay Department of Labor and Employment (DOLE) regional director Raymundo Agravante, nasa kabuuang 360 kumpanya ang lalahok sa mga job fairs kung saan 254 ang Philippine-based.

Umaasa si Agravante na maabot ng Regional Office 3 ang target ng DOLE sa “hired on the spot” ngayong taon na hindi bababa sa 15 porsyento ng lahat ng mga aplikante.

Bukod sa pag-alok ng mga trabaho, nasa mga lugar na iyon din ang mga attached agencies ng DOLE na Overseas Workers Welfare Administration (OWWA), Philippine Overseas Employment Administration (POEA), National Conciliation and Mediation Board (NCMB), National Labor Relations Commission (NLRC), at Technical Education and Skills Development Authority (TESDA) upang i-alok ang kani-kanilang mga serbisyo.

Makikibahagi din ang ibang mga ahensya tulad ng National Statistics Office, National Bureau of Investigation, Social Security System at PhilHealth upang tugunan ang mga pre-employment needs ng mga jobseekers. (WLB/CLJD-PIA 3)