Ilocano News: 5 nga ili ti NUeva Vizcaya, maikkan proyekto nga mangted mainum nga danum

By Benjamin Moses M. Ebreo

Sunday 19th of February 2012

BAYOMBONG, Nueva Vizcaya, Feb. 19 (PIA) – Lima nga ili ditoy a probinsia ti maikkan pondo tapno makaipatakder kadagiti proyekto nga pangalaan ken paginuman iti danum nangnangruna sadiay adayu a paset iti barangay.

Sigun kenni Atty. Odilon Pasaraba, pangulwen ti Department of Interior and Local Government (DILG), dagiti maikkan pondo nga saan a sumurok P1 nga milyun kada maysa ket iti ili ti Alfonso Castaneda, Aritao, Ambaguio, Dupax del Norte ken Dupax del Sur ita a tawen.

Kinuna pay ni Pasaraba nga iti maited nga pondo ket agtaud iti programa nga SALINTUBIG wenno “Sagana at Ligtas na Tubig para sa Lahat” nga tartarawidwidan ti DILG, Department of Health ken iti National Anti-Poverty Commission.

Ti SALINTUBIG, sigun kenni Pasaraba ket programa iti national government nga aggandat a makaited kadagiti nailinis, natalged ken mainum nga danum kadagiti barangay tapno maliklikan iti sakit nga agtaud kadagiti panaginum ti danum a narugit.

Innayun pay ni Pasaraba nga adda iti mapasamak ng orientation seminar workshop para kadagiti nakuna nga ili tapno inda aramiden dagiti plano sakbay nga rugyanda daytoy nga proyekto kadagiti komunidad da.

Ti nasao nga pondo para iti SALINTUBIG a programa ket maited kadagiti local government units nga nasayaat iti kabablin da nga agiwayat kadagiti programa, proyekto ken aktibidades kadagiti masakupan da nga barangay.

Sinanama ni Pasaraba nga manayunan pay dagiti ili nga maikkan iti pondo nga nasao tapno makaaramid da kadagiti proyekto nga mangted nam-ay ken talged iti salun-at da. (TCB/BME-PIA 2 Nueva Vizcaya)