Panagkumao kadagiti ubbing tapno mailako dagiti nagunegda

By Imelda C. Rivero

Monday 4th of July 2011

VIGAN CITY, Ilocos Sur, Hulyo 4 (PIA) -- Kumao? Adda nakumao nga ubbing? Agpaypayso aya ti kumao? Dagitoy madamdamag a panagkidnap, panagala, wenno panagkumao a kunatayo, kadagiti ubbing ket adda a nailanad iti Anti-Trafficking in Persons Act of 2003.

Ikkantayo iti importansia dagitoy panagawan dagiti ubbing a madamdamag ta agpayso ken mapaspasamak daytoy kas kuna ti linteg.

Ti Anti-Trafficking in Persons Act of 2003 wenno Republic Act 9208 ket mangted kadagiti polisia ti gobierno tapno maikkat daytoy trafficking in persons, kangrunaan dagiti babbai ken ubbing. Daytoy a linteg ket pundarenna dagiti kasapulan a wagas tapno masalluadan ken masuportaran dagiti nabiktima, ken maited ti umisu a dusa kadagiti nagbasol.

Ania aya daytoy trafficking in person? Adu dagiti mamati nga adda dagiti makumkumao. Adu met dagiti mamati a dagitoy a damag ket pangbutbuteng laeng. Ania ti kinapudno?

Maysa nga illegal act ti ‘trafficking in persons’ . Maysa daytoy a pannakalabsing ti ‘human rights’ wenno karbengan kas maysa a tao. Ket daytoy nga aramid ket dadaelenna ti dignidad ti maysa a tao ken ti panagdur-as ti maysa a pagilian.

Dagitoy sumaganad dagiti mairaman iti ‘trafficking in persons’. Ti panagrecruit, panagtransport, panagitransfer, panangawat ken panangharbor ti maysa a tao wenno ad-adu pay. Daytoy ket naaramid nga awan ti pammalubos wenno adda pammalubos ti biktima.

Mabalin a naaramid daytoy iti uneg wenno ballasiw ti national boundaries. Naaramid babaen ti pangta wenno panagusar ti puersa, wenno dadduma a kita ti panagpilit, abduction, fraud, deception, panagabuso ti bileg wenno posision, panangted wenno panangawat ti bayad wenno benepisio tapno magun-od ti pammalubos ti maysa a tao nga addaan ti kontrolna iti sabali a tao.

Maar-aramid daytoy tapno maexploit ti tao, kas ti sexual exploitation, forced labor or services, slavery, ken pannakaikkat wenno pannakailako dagiti naguneg wenno organs wenno dadduma pay a kasla kastoy nga aramid.

Pannakaibalud ti tungpal biag ti dusa ti qualified trafficking. Maaramid ti Qualified Traffickin in Person no ti biktima ket agtawen ti 17 anyos agpababa. No ti adoption ket babaen ti Republic Act 8043 wenno Inter-Country Adoption Act of 1995. Ket daytoy nga adoption ket nairanta para ti prostitution, pornography, sexual exploitation, forced labor, slavery, involuntary servitude wenno debt bondage.

Kasta met no ti krimen ket inaramid ti sindikato, wenno large scale. Ti nagaramid ket maysa nga ascendant, nagannak, kabsat, agay-aywan wenno tao nga adda otoridadna iti nabiktima, wenno ti nagaramid ket maysa a public official wenno empleado.

No ti biktima ket narecruit tapno agbalin a prostitute babaen ti siasinoman a kameng ti military wenno law enforcement agencies.

No ti nagaramid ket kameng ti military wenno law enforcement agencies.

Gapu ti pannakatraffickna daytoy a tao ket matay, madadael ti nasimbeng a panunutna, madadael dagiti paset ti bagina wenno maakaran ti Human Immunodeficiency Virus wenno Acquired Immune Deficiency Syndrome. (ANL/ICR-PIA 1 Ilocos Sur)