Ilocano news: Saan a matay ti industria ti tabako gapu ti sin tax - Chavit

By Ben P. Pacris

Friday 31st of August 2012

VIGAN CITY, Aug 31 (PIA) -- Inwaragawag ti maibilang nga “Ama ti Tobacco Excise tax Law” a saan a matay ti industria ti tabako no maaprobaran ti kontrobersial a “Sin Tax” Bill a pannakaingato ti singir ti sigarilio ken arak no ket di ngumato ti pundo ti gobierno para iti pannakaisayangkat degiti programa ken serbsiio para kadagiti umili.

Kinuna ni Gob. Luis “Chavit” Singson, national chairman ti League of Provinces of the Philippines, a saan koma nga agdanag dagiti mannalon aglalo dagiti agmulmula iti tabako a birhinia nga agkunkuna a no ngumato ti buis ti sigarilio bumassiten ti agsigarilio. “Saan a pudno daytoy ta ‘in demand’ daytoy nga industria aglalo iti ballasiw-taaw,” kinuna ti dati a Diputado.

Inlawlawag ni Gob. Singson a no maaprobaran ti “Sin Tax” iti Kongreso, umabot iti agarup P60 bilyon ti mapastrek a pundo ti national government manipud iti masingir a buis ti sigarilio ken arak. “Ngumato pay ti pundo ti RA 7171 nga umay iti Ilocos Sur, Ilocos Norte, La Union ken Abra a dakkel unay a tulong para kadagiti padatayo nga ilokano.”

Kinuna ti gobernador nga iti laksid pay iti kampania iti sangalubongan kontra iti panagsigarilio numan pay maapektaran ti industria ti tabako ngem saan a matay daytoy nga industria ta dakkel met ti maitulongna a mangpataray iti ekonomia ti pagilian. “Adu dagiti matulongan a mannalon iti intero a pagilian ken dagiti kameng ti pamiliada, dagiti agtrabaho kadagiti paktoria ti sigarilio, dagiti trading centers agdepende ti matgedanda iti industria ti tabako,” innayon ti Gobernador.

Kabayatanna, inwaragawag ni Congressman Ryan Singson a paboranna unay ti “Sin Tax Law” ta manayonan ti pundo ti gobierno a pangisayangkat kadagiti programa ken serbsiio dagiti umili. “Babaento daytoy a pundo, matulongan pay dagiti ospital ti gobierno tapno mapasayaat ti serbisio medical a maipaay kadagiti kakailian nangruna dagiti marigirgat,” kinunana.

Makitinnulong pay dagiti diputado iti Amianan a kamengti nabileg a Northern Luzon Alliance a mangilaban ken mangsalaknib daytoy kangrunaan nga industria tapno saan a mapukaw, kinuna ni Cong. Singson.

Uray iti biang ni Administrador Edgar Zaragoza iti National Tobacco Administration (NTA) kinunana a daytoy pundo manipud iti “Sin Tax” tumulongto met laeng para iti programa ti salun-at ta no ad-adu ti pundo ti gobierno agsubli met laeng para iti serbisio dagiti umili nangruna iti benneg ti agrikultura ken salun-at.

Kiniddawna kadagiti mannalon a nasken laeng a surotenda dagiti baro a teknolohia iti panagmula tapno sumayaat ti kalidad dagiti apitda a tabako ta daytoy ti laban iti sangalubongan a merkado.

Kinuna pay ti administrador a plano ti NTA ti mangbangon iti Meat Processing Plant iti Narvacan tapno makatulong a mangnayon iti matgedan dagiti mannalon ken makatulong pay a mangparang-ay ti ekonomia. (ANL/BPP-PIA 1 Ilocos Sur)

GIST: Gov. Chavit Singson, Congressman Ryan Singson and NTA Administrator Edgar Zaragoza emphasized that the enactment of Sin Tax Bill in Congress will not affect the tobacco industry, the main crop of the Ilocano farmers, but it means “More funds, more projects, more services for the people.” The P60 billion additional funds from “Sin Tax” will create agri-business and upgrade government hospitals.