Iloco news: 300 empleado ti gobierno nakisali ti ‘fun run’

By Esteleta M. Rafanan

Thursday 20th of September 2012

ISIUDAD TI SAN FERNANDO, La Union, Sept 20 (PIA) -– Nakisali ti agarup tallo gasut nga empleado ti gobierno iti “Fun Run 2012: Takbo ng Kawani Laban sa Yosi 2” itay nabiit a kas paset ti panagsuportada ti adbokasia iti gobierno maipanggep ti ’smoke-free-bureaucracy’ nga indaluan ti Civil Service Commission (CSC 1) ditoy Rehion 1.

Gandat daytoy nga aktibidad a matulongan dagiti empleado ti gobierno tapno maammuanda ti rumbeng nga aramidenda tapno mapatalged dagiti salun-atda ken produktibo a panagtrabahoda a kas paset ti CSC Memorandum Circular No. 17 series of 2009.

Adda iti naaramid a pasalip ti 3k ken 5k a kategorya para ti lallaki ken babbai. Dagiti mangabak ket makaawat ti medalya a kas premyoda.

Iti nangabak ti umuna a puesto para ti 3K a kategorya ti lallaki ket ni Jeffrey C. Valdez ti Bureau of Fire Protection (BFP); Wilfredo D. Labsan, maikaddua a puesto, manipud ti lokal a gobierno ti San Juan; ken Joseph P. Ulnes ti BFP iti nangabak ti maikatlo a puesto.

Iti kategorya met ti babbai, nangabak ti umuna a puesto ni Lani Peralta ti Philippine National Police; Josephine Dangli ti BFP ti maikaddua; ken Jocelyn Villador ti maikatlo a puesto.

Idinto ta ti kategorya para ti 3k a lallaki, napagasatan ni Edric Salvacion a nagkampeon. Maikaddua ni Orano Torano ken ti maikatlo ni Lester Allan Nartatez a pada a naggapu iti PNP.

Nakaala met ti Philippine Navy iti tallo a gungguna para ti 5k a kategorya ti babbai nga isuda Joy Domingo, Gladys Villanueva ken Marites Macaraeg.

Adda ti naited a ‘certificate of recognition’ kadagiti kameng ti polisya nga isuda iti kaadduan ti partisipante ken ‘certificate of participation’ para kadagiti empleado ken agensiya ti gobierno.

Manipud iti daytoy a programa, daytoy ket maysa a nasayaat nga indikasyon a ti panagkaykaysa ken nagagaget nga empleado ti gobieno ditoy Rehion 1 ket dakkel a katulongan ti CSC a kas paset ti panagsuporta ti adbokasia iti gobierno ti “100 Percent Smoke-Free Policy”, kuna ni Engelbert Anthony D. Unite, CSC-1 regional director.

Dagiti dadduma a nakisali ket dagiti opisina ti Bangko Sentral ng Pilipinas, Commission on Human Rights, Department of Education, Commission on Population, National Food Authority, Philippine Information Agency, Philippine Ports Authority, Philippine Red Cross-La Union Chapter, Don Mariano Marcos Memorial State University, ken dadduma pay.

Iti tema ti selebrasyon ita a tawen ket “Kawani, Ikaw ay Isang Lingkod Bayan a kas paset ti maika-112 nga anibersario ti Philippine Civil Service iti daytoy a bulan. (ANL/EMR-PIA 1 La Union)