Ilocano news: Siudad ti San Fernando nangipaay manen ti nadumaduma a serbisyo ti People’s Day

By Esteleta M. Rafanan

Wednesday 19th of September 2012

SIUDAD TI SAN FERNANDO, La Union, Set 19 (PIA) -- Nangipaay manen ti siudad ti San Fernando ti maikapito a People’s Day a naangay diay Barangay Canaoay idi Septiembre 8 a nasakupan ti uppat a barangay.

Daytoy ket masakupan ti barangay Canaoay, Poro, San Agustin, ken San Francisco.

Kas idi napalpalabas a People’s Day ditoy siudad, nangipaayda manen iti nadumaduma a serbisyo nga indauluan ni Mayor Pablo C. Ortega.

Dagitoy a serbisyo a naipaay iti daytoy a programa ket iti sumaganad: libre a panagpakonsulta, panagpakapon dagiti ububbing, panagpabunot ti ngipin, panagpakan ken dadduma pay.

Nangted met dagiti empleyado iti nasao a loka a gobierno ti inpormasyon maipanggep ti agrikultura, salun-at, aglawlaw, ken ti ordinansa maipanggep ti negosyo ken individual ‘permits ken license’, ‘real property’ ken dadduma pay tapno maammuanda a ti datoy a serbisyo ket dakkel a tulong ti maited na nangnangruna ti panagbiagda.

Kas paset ti programa, adda naaramid a ‘Talakayan’ dagiti bumarangay ken dagiti opisyales, kas maysa a gundaway a nangiyebkasan dagiti problemada maipanggep ti panaglayus no dumteng ti panawen ti panagtutudo, kanayonan a garbage truck’ ken panagkasapulanda para ti pannakaanamong ti ordinansa a mangsuporta ti ‘marine protected areas’ ken panagduras ti panagbiagda.

Impasigurado ni Mayor Ortega nga aramidenda ti kabaelanda a mangresolbar dagiti dawat iti nadumaduma a barangay.

Nagited dagiti opisyales ti lokal a gobierno iti computers, kopya ti citizen’s charter ken sangagasut a ribo a piso ti kada barangay tapno maaramatda a panagpatarimaan ken panagkumpuni ti entabladoda.

Sangapulo nga ububbing iti day care ti napaayan ti arwatenda ti panageskuelada.

Timmabuno met iti selebrasyon da Vice Mayor Hermenigildo A. Gualberto, Sangguniang Panlungsod ken dagiti Sangguniang Kabataan.

“Our Home – Bringing Services to your Doorstep” ti tema iti daytoy a programa nga mangmangted serbisyo ditoy siudad kadagiti makasapul ti tulong nangnangruna kadagiti barbarangay.

Ti samaruno a People’s Day ket maigannuat inton Septiembre 28 a masakupan ti barangay Ilocanos Sur, Ilocanos Norte ken Pagdaraoan a maangay diay San Fernando City Gym.(JCR/EMR-PIA1 La Union)