Maguindanaon news : Guberno nu Australia paginggay kanu $3-M sa MRDP

By Herohito M. Yoshioka

Wednesday 1st of August 2012

KORONADAL CITY, South Cotabato, Aug 1 (PIA) -- Pakauman a mga pruyikto a kabpangunguyagan su kabpanganganayan a manggugunan nu mga taga-Mindanao sabap kanu makabago a ayuda ataw ka tabang a ganat sa guberno nu Australia sa Mindanao Rural Development Program (MRDP).

Inipayag ni MRDP Director Lealyn Ramos sa pagalaga kanu telu ka minyun a dolyar ($3 million) su tabang nu AusAID a padtuman kanu kabpaginggay sa tabang a teknikal sa makagkapiya ataw ka makapagiseg kanu kainggay sa serbisyu a pang-agrikultura ganat sa kinandisenyu kanu mga pruyikto, kabpanggulalan kanu mga pruyikto taman sa monitoring endo evaluation.

Tigin ni Ramos, nakatalanged su nadtelu a pondo kanu kabpaginggay nu kabpangunguyagan kanu mga komunidad kaped su mga lokal a guberno endo kanu mangagan a kapadsampay kanu serbisyu sa agrikultura endo su kabpanginsadaan.

Ipabpakilala bon nu MRDP su mga bago a ukit-ukitan kanu kabpanegosyu pinagusal su “value-chain approach” taman kanu kinatukoy kanu mga kapaki-pakinabang a agri-based public-private partnership (PPP).

Ininggayan kanu mana ni Ramos na su langun a galabaken siya na base pem bon sa core value nu kanilan a prugrama a nakabpayag endo aden sawal kanu galabaken ataw ka serbisyu ataw ka kabpagamong kanu mga komunidad endo su lokal a guberno nu tinabangan.

Kanu ulina nu tudtulan, su MRDP na pangunahing inisyatibu nu DA kontra sa kapasang siya sa kanayunan, Sakop nu prugrama su 225 a dalapa sa 26 a prubinsya kanu langun nu sakop nu Mindanao. (HMY-PIA 12)