Maguindanaon news: Mga magingay ibpabpatadaman kanu ligtas a kambata

By Herohito M. Yoshioka

Tuesday 31st of July 2012

KORONADAL CITY, South Cotabato, July 31 (PIA) – Ibpapatadamen ni South Cotabato Provincial Health Officer Dr. Rogelio Aturdido kanu mga magingay sa galabaken e kabpapagilay ataw ka checkup sa doktur.

Su mga magingay, tigin, nisisita e ambata bo kanu otorisado a health facility ataw ka sa ospital, endo sa lima nu health professional andu makalipuas kanu komplikasyun endo makaiwas bon sa makabated sa alanganin su ngiwa nu ina ataw ka prenatal checkup.

Kanu langun nu gay a kinagkagingay, nisisita sa dikana ambaba kanu makapat ambabalingan mangay su mga magingay sa health facility a para sa prenatal checkup.

Kanu niya a ukit-ukitan e makadsiguro kanu kagkompletu nu serbisyu a makainggay sa kanilan, ataw ka kanu nisisita a bakuna endo importante a mga impormasyon ataw ka tudtulan sa aden lakit lambay nin kanu ligtas a kabpambata.

Pantag kanu data nu Integrated Provincial Health Office (IPHO) nu South Cotabato na pitutiman den e minatay sabap kanu kinambata ganat kanu minukit a Enero taman sa gugunayan, ugayd pila kanu kanilan na ganat sa mga pagubay a prubinsya.

Kadakalan kanu mga biktima a mga minatay na sabap sa dala pen nilan pinananggit ataw ka mauget pen nilan pinananggit sa ospital su pembata a magingay.

Pila bon kanu kanilan e minatay sabap sa sepsis o impeksyon sabapan nu bacteria endo kaped pen a mga germs amayka mapased su kinambata.

Kanu gugunayan, inisugo ni Dr. Aturdido su kabpangumbal sa maulad a kabpangagi pantag kanu mga sirkumstansya endo mga sabapan a kabpagkapatay nu mga pambabata nu ina kanu niya a nalipus a ulan-ulan.

Kanu ulian nu tudtulan, padsiguron bon nilan sa idtatalus su kanilan a kabpandalakita kanu adbokasiya a kanu kaligtasan nu mga magingay endo pambabata. (HMYoshioka/PIA-12)