Cebuano news: Cebuano leaders, LGUs nipasalig pagtampo og lakang alang sa disaster preparedness

Friday 1st of June 2012

CEBU CITY, June 1 (PIA) -- Ang mga Cebuano leaders ug local government units (LGUs) dinhi sa probinsya sa Sugbo nikomiter sa pagtabang aron masiguro ang kaluwasan ug kaandam sa ilang tagsa tagsa ka mga dapit panahon sa mga kalamidad pinaagi sa pagpatuman sa mga programa may kalambigitan sa disaster preparedness ug climate change adaptation.

Ang mga opisyales sa kagamhanan ug mga LGU nipadayag niini nga intensyon atol sa gipahigayon nga recent “Tapatan Roadshow on Disaster Preparedness and Climate Change Adaptation: A Call to Action" dili pa lang dugay didto sa Cebu International Convention Center sa siyudad sa Mandaue nga organisar sa Department of Interior and Local Government.

Si Board Member Peter John Calderon sa ikaduhang distrito sa Sugbo nagkanayon nga tumong gayud sa mga LGU ug mga nasyonal nga ahensya sa kagamhanan nga mamahimong andam sa matag kalamidad ug siguroon gayud nga maong preparasyon gimugna aron pagpaminos sa risgo, hulga og negatibo nga epekto niini ngadto sa kinabuhi ug kabtangan sa mga katawhan.

Iya usab nga gi aghat ang publiko sa pagpakabana ug paghimo og lakang aron maminosan ang mga kinabuhi nga makalas ug mga kabtangan nga mga guba panahon sa kalamidad.

Samtang si Mandaue City Mayor Jonas Cortes nipadayag sa iyang tinguha sa matag LGU nga mamahimong pundasyon sa disaster preparedness measures nga pagahimoon saw ala pa ug human sa mga kalamidad.

Matud pa ni Cortes ang pagprotektar sa kinabuhi ug pagsiguro sa kabtangan sa publiko mao ang nag-una nga obligasyon og concern sa matag LGU ug kagamhanan ug nga matud pa sa mayor nga obligado gayud sila nga motuman niini nga obligasyon ngadto sa ilang mga konstitwente. Sanglit ang seguridad ug preparasyon mao ang nag unang angay nga buhaton may kalambigitan sa disaster preparedness.

Dugang pa ni Cortes nga ang climate change mitigation parte usab sa matag obligasyon sa matag LGU sa pag serbisyo sa publiko taliwala sa kasamtangan nga hulga sa climate change ug grabe nga ka pag usab-usab sa dagan sa panahon dinhi sa nasud.

Subay niini nanawagan usab siya og panaghiusa tali sa mga LGU ug publiko ingon man sa lain pa nga mga hingtungdan sa pagsagubang og pakigbatok sa hulga sa kalamidad ug climate change.

Gitataw ni Cortes nga ang matag LGU kinahanglan nga magkat-on pinaagi sa matag usa kanila, aron pagpakigbatok og pagdaog niining kasamtangan nga mga pagsuway gumikan sa mga kalamidad ug climate change. (RMN/AS-PIA7 CEBU)