Cebuano News: Training program alang sa K-12 system gilunsad

By Amorganda A. Saludar

Friday 18th of May 2012

CEBU CITY, Mayo 18 (PIA) -- Mokabat ngadto sa 200 ka mga administrador gikan sa publikong tunghaan sa elementary ug sekondarya ingon man mga magtutudlo sa sekondarya nga nagtudlo sa Science, Mathematics, ug English ang moagi unya og pagbansay bansay sa mga nagkadaiyang programa gikan Mayo 14 hangtud 26 sa Indah Hotel, Villegas St. (formerly Arroceros), Manila.

Matud pa ni Rep. Lorenzo “Erin” R. Tañada III, nga mao’y ni sponsor sa Summer 2012 Training Programs, pinaagi sa pakig-alayon sa Philippine Normal University (PNU).
ang pagbansay bansay gitumong alang sa pag-andam unya ug pagpausbaw sa mga magtutudlo ubos sa programang K-12.

Dugang pa niya nga ila gayud nga ipahigayon ang training matag bakasyon apan karon tuiga giapil nila ang modules nga mopausbaw sa katakos sa mga magtutudlo ubos sa sistema sa K-12.

Gipadayag usab ni Tañada nga magsilbi usab kini nga ilang kontribusyon alang sa pagpreparar sa mga magtutudlo alang unya sa panginahanglanon sa programang K-12 ingon man aron mapausbaw pa ang kapalidad sa mga magtutudlo.

Ang kindergarten ug ang 12 ka tuig sa elementary ug high school o ang K-12 bag-o nga scholastic curricula sa Department of Education alang sa primary ug secondary education sa mga pampublikong tunghaan diin 2 ka tuig ang gipuno sa dili pa makalahos sa kolehiyo ang mga tinun-an.

Gipadayag usab ni Tañada nga ang tumong sa K-12 mao ang paghatag og maayong kalidad nga 12 ka tuig nga programa sa edukasyon diin matag Filipino ang adunay katakos nga makapahimulos niini.

Dugang pa niya nga imprtante kaayo alang sa mga magtutudlo ug mga administrador sa mga tunghaan nga masayod sa mga bag-o nga methods ug prinsipyo sa pagpanudlo aron sila mamahimo nga epektibo mga magtutudlo sa bag-ong henerasyon sa mga kabatan-onan.

Academic Leadership Quality: Meeting Challenges in the Implementation of the K-12 Curriculum ang tema alang sa mga administrador sa mga publikong tunghaan nga motambong niini nga training samtang Critical Thinking and Problem Solving Skills: Key to Economic Sustainability and Progress usab alang sa mga magtutudlo. (AS/PIA-7, CEBU)