Pangasinan news: Agew na Propesyonal ginawa na PRC ed Pangasinan

By April Montes

Monday 3rd of September 2012

URDANETA CITY, Pangasinan, Sept 3 (PIA) -- Ginawa so Agew na Propesyonal natan ya agew ed Urdaneta City Cultural and Sports Center ed siyudad na Urdaneta diad panangidaolo na Professional Regulation Commission (PRC).

Onong ed si Alex Ferrer, hepe na Provincial Employment Services Office (PESO), getma na sayan programa ya iyasingger iray serbisyo na PRC pian ag la onla ray propesyonal ed siyudad na Baguio ya manproseso tan mangala na lisensiya da. Ag met la ra mangastos na piliti ed sayan programa.

Kaiba ed saray serbisyon iter na PRC et say panlista na saray pinmasa ed nandoroman eksamin; pan-“renew” na lisensiya; pangiter na lisensiya, “board certificate” tan “certification of good standing;” tan pangawat na aplikasyon parad saray nagawan eksamin.

Nagawa met ya no a-duamplo tan apat na Setyembre ed Arenas-Resuello Sports Complex diad siyudad na San Carlos; a-dose na Oktubre ed Provincial Training and Development Center diad baley na Lingayen; tan no duamplo tan anem na Nobyembre ed Bayambang Covered Court diad baley na Bayambang.

Ipapanonot na PRC ed saray mangala na lisensiya tan “board certificate” ya man-“e-mail” diad prcbaguio.regulations.renewal@gmail.com o man-teks diad 0921-969-3919 na pasen ya pangalaan da; ngaran; propesyon; “registration number;” tan petsa no kapigan ira nanpalista talura o apatiran agew antes ya ombisita so PRC. (ANL/AM-PIA1, Pangasinan)