Pangasinan news: Saray eskuelaan ed siyudad na Dagupan manpa-“make-up classes”

By April Montes

Thursday 16th of August 2012

SIYUDAD NA DAGUPAN, Agosto 16 (PIA) -- Onong ed Department of Education (DepEd), amin ya eskuelaan ed sayan siyudad et manpa-“make-up classes” manlapud bulan na Setyembre pian nasalatan ira may agew ya anggapoy orong lapud mauran nen sakey a-simba.

Onong ed si Dr. William Macob, education supervisor na saray eskuelaan ed sayan siyudad, wala so napampilian na saray manangidaolo na eskuelaan pian nakumpleto so bilang na agew diad eskuelaan ya insaklang na DepEd natan ya taon.

Sakey ed saya so panklase no agew ya Sabado o pan-osar na samay sakey simba ya “semestral break.” Sarag to met ya bawasan da may duaran simba ya bakasyon no Disyembre o man-arom na duaran oras ya klase ed sakey agew pian naala may kaokolan ya “contact time” na managbangat ed saray eskuela da.

Wadiad DepEd Order No. 26 ya duaran lasos so total ya bilang na agew diad eskuelaan ed sayan taon. Say sanlasos tan walumplon agew ed saya et parad panagbangat na saray maestro o maestra. Say akeran duamplon agew et parad saray lokal ya pista-opisyal tan saray nandoroman kimey ed eskuelaan. (ANL/AM-PIA1 Pangasinan)

Gist: The Department of Education (DepEd)-Dagupan City enjoined all schools here to conduct make-up classes starting in September to offset lost school days, following the consecutive class suspensions on Tuesday to Friday last week, brought by the inclement weather. School heads may opt to hold classes on Saturdays; to use the one week semestral break; to cut the two weeks Christmas break in December; or to add at least two extra school hours a day, which method is best applicable, to complete the prescribed number of days for this school year.