Pangasinan news: Koro ed Pangasinan onsali ed kompetisyon diad China, manprisinta ed New York

By April Montes

Thursday 26th of July 2012

CALASIAO, Pangasinan, Hulyo 26 (PIA) -- Onsali so Calasiao Children’s Chorus ed sayan baley diad 1st Xinghai International Choir Championships ed Guangzhou, China no a-otso anggad a-katorse na Nobyembre.

Onong ed si Gilbert Allan Dispo, direktor tan konduktor na koro, kuma-siyamera ed sanlibon koro diad intiron mundo so Calasiao Children’s Chorus. Ontuloy so koro ed sayan puwesto no onsali ra ed kompetisyon.

Manprisinta met yan koro ed Distinguished Concerts International New York (DCINY) no Enero 2013.

Onong ed si Maan Parayno, manedyer na koro, say Calasiao Children’s Chorus so onaan ya grupo na saray Filipino ya manpalabas ed DCINY “concert series” diad Carnegie Hall.

Talumplon ogogaw ya mantaon na pitura anggad labin-anem so kaiba ed sayan koro. Nankampeon ira ed 1st Korean International Open Choir Competition (folklore category) ya ginawad Korea nen 2009.

Akaawat met iray arom ni ran pamagalang ya nanlapud saray sinalian da tan diad saray publiko tan pribado ya organisasyon.

Impormisa na gobierno ed luyag ya suportaan da ray pangkaokolan na koro pian ontan et manalo ra ed internasyonal ya kompetisyon ya salian da. (ANL/AM-PIA1 Pangasinan)