Pangasinan news: PESO manangidaolo na “jobs fair” natan

By April Montes

Saturday 23rd of June 2012

LINGAYEN, Pangasinan, Hunyo 23 (PIA) -- Wala so nagawan “jobs fair” natan a agew diad Kalantiao Building ed sayan baley diad panangidaolo na Provincial Employment Services Office (PESO).

Onong ed si Alex Ferrer na PESO, wala ray trabahon manaalagar ed saray aplikante para dia odino diad arom ya bansa.

Parad arom ya bansa, manaanap na saray “general worker” tan drayber so Saudi Arabian Airlines Ground Services.

Onong ed si Ferrer, nepeg ya saray aplikante parad “general workers” et mantaon na bainte dos anggad tirentay singko tan aliwan kaokolan ya sikara et walay eksperiyensiya.

Iray aplikante parad drayber balet et nepeg ya mantaon na bainte anggad kuarenta, walay eskperiyensiya ed panmaneho na luganan tan nakaukolan ya walay lisensiya.

Kaokolan iray trabahador parad bangko diad bansa tayo. Saray bakanten posisyon et “branch manager,” “teller,” “branch accountant,” “branch cashier,” tan “project or account officers.”

Ipapanonot nen Ferrer ed saray aplikante ya ag da lilingwanan ya awiten so “resume” tan arom ni ran dokumenton kaukolan no manaanap na trabaho. (PIA 1, Pangasinan)

=========================

Gist: A jobs fair for overseas and local employment will be held on June 23 at Kalantiao Building in Lingayen town spearheaded by the Provincial Employment Services Office (PESO). Job openings include general workers and drivers for the Saudi Arabian Airlines Ground Services. On the other hand, positions for local employment, specifically for bank workers are as follows: branch manager, teller, branch accountant, branch cashier, and project or account officers. Applicants are advised to bring their resume and credentials.