Pangasinan news: Pansulat ed literaturan Pangasinan kinerew

By Alex Romeo R. Fernandez

Thursday 2nd of August 2012

LINGAYEN, Pangasinan, Agosto 2 (PIA) -- Kinerew a pigaran propesyonal a managsulat diyad luyag so pansulat na literatura osar so salitan Pangasinan.

Imbaga nen Santiago Villafania ya diyad nagagawan workshop ed Manila tan Cordillera et dakel a managsulat so mantetepet no akin et daiset so nanenengneng dan literaturad Pangasinan.

Si Villafania, managsulat na anlong ed lokal a salita, et sakey ed saray nansirbin panelists diyad agawan unaan ya Pangasinan Writers’ Workshop ed Capitol Resort Hotel diad baley nen Sabado.

Say abitlan workshop et dinagopan na duamplo ed saray akibiang ed First Pangasinan Literary Contest ya ginawa nen Abril.

Tinongtong ed workshop so pansulat na marakep ya anlong, antikey a tongtong tan salaysay.

Kasompalan na workshop, saray akibiang et nantuop na grupo ya tinawag dan Kapi-Tuyaw, lapod salitan ‘kapitolyo’ tan ‘tuyaw.’

Inpormisa nen Ma. Luisa Elduayan, tourism officer tan say nan-organisa ed abitlan workshop, ya ingaran so sakey a shed ed gilid na kapitolyo parad say abitlan grupo.

Kaiban nansirbin kritiko ed workshop si Sergio Bumadilla, editor-in-chief na Balon Silew magasin; tan Ferdinand Quinto, sakey ya abogado tan managsulat ed lokal a lenguahe. (PIA-Pangasinan)