Hiligaynon News: Ekonomiya sang Rehiyon 12 padayon nga nagasaka

By Edgar V. dela Cruz

Thursday 2nd of August 2012

KORONADAL CITY,South Cotabato, Agosto 2 (PIA)-- Ang pagsaka sang ekonomiya sang Rehiyon 12 may daku nga kabangdanan sa pag-ayo sang 2011 tungod sa sekta sang agrikultura kag industriya sa duog padayon nga nakaangkon sang pagsaka halin sa pagpalapad kag pagpaayo sang pagpalakat sang nagligad nga duha ka tuig.

Si National Statistical Coordination Board, rehiyon 12 director Herlita Caraan nagsiling nga ang mabungahon nga pagsaka sang industriya, panguma kag pangisda nagbutong pasaka sang ekonomiya o kon Growth Regional Domestic Product (GRDP) sang nagligad nga tuig sa apat ka porsiyento halin sang 2010.

Siling niya nga ang padayon nga pagdasig sang pag-uswag sang rehiyon mas daku sang gamay sa kabug-usan sang pungsod sang nagligad nga tuig nga nag-abot sa 3.9 porsiyento.

Hambal pa niya nga ang rehiyon 12 isa sa lima ka rehiyon sa pungsod nga nakalista sang pagdasig sang pag-uswag halin sang 2010 hasta 2011.

Siling pa gid niya nga ang rehiyon sa subong nagalapit na sa anay nalista nga pag-uswag nga 4.5 porsiyento nga nalista sang 2008. Ang rehiyon 12 ginkabig na nga ikatatlo nga may madasig nga pag-uswag sang ekonomiya sa pungsod.

Hambal pa gid ni Caraan nga ang agriculture, hunting, fishery kag forestry (AHFF), nga nakalista sang mga 30.2 porsiyento sang ekonomiya sang rehiyon, nagpakita sang 2.2 porsiyento nga pagsaka sang 2011 pagkatapos nga magnubo sa 2.7 porsiyento sang 2010.

Dugang pa niya nga ang panguma kag pangahoy naglumpat sa 4.8 psiyento nga pagsaka sang nagligad nga tuig halin sa mahuyang nga nahimo nga 1.3 porsiyento sang nagligad nga tuig.

“Ang pag-ayo sang nahimuan sang AHFF tungod sa mataas nga patubas halin sa rehiyon nga mga nagapanguna nga tanum nga amo ang humay, mais, tubo, saging, lubi goma kag kamote kahoy. Ang pagsagod sang manok kag amo man ang municipal fishery kag aquaculture nakahimo man sang pag-ayo sang 2011”. Siling pa ni Caraan nga gintumod subay sa report sang Department of Agriculture’s Bureau of Agricultural Statistics.

Dugang pa gid ni Caraan nga ang sekta sang industriya nagbulig man pagpaayo sang ekonomiya sang duog pagkatapos nga nagsaka sa 5.5 porsiyento sang 2011 halin sa 2.9 porsiyento sang 2010.

Mahibaluan nga ang sekta sang industriya, nga nagasakop sang 31.2 porsiyento sang kabug-usan nga ginahalinan sang ekonomiya sang rehiyon, nagsaka tungod sa kabug-usan nga sub-sector sang pagprodukto, nga nakalista sang mabungahon nga pagsaka sang14.6 porsiyento halin sa magamay nga nahimo nga 0.2 porsiyento sang 2010.

Ang daku nga nahimo sang manufacturing sub-sector amo ang nakapugong sa pagnubo sa konstruksiyon, kag ang kahuyang sang pagsaka sa nalista sa pagmina kag quarry amo man ang elektrisidad, gatong kag tubig nga ginagamit sa balay. (EBdelaCruz/PIA12)