Hiligaynon News: Malaysia may tuyo nga magbutang sang negosyo sa palm oil sa South Cotabato

By Edgar V. dela Cruz

Wednesday 11th of July 2012

KORONADAL CITY,South Cotabato, Hulyo 11 (PIA) -- Ang gobyerno Malaysia ginaduso ang pagbaskog sang negosyo kag pakigsosyo sa pagbutang sang pondo sa South Cotabato pinaagi sa bag-o nga pagnegosyo sa pagprodukto sang palm oil.

Si Malaysian Ambassador Dato Seri Datu Hajj Dr. Ibrahim Saad nagsiling nga ila tukibon ang posibilidad nga magdala sang mga kumpanya sang Malaysia nga magnegosyo sa palm oil sa probinsiya, nga sang una nakita sang mga sampaton nga puwede ang duog sa tanum nga africam palm.

Siling pa niya nga ang Mindanao, ilabi na ang mga probinsiya sang South Cotabato kag Sultan Kudarat maayo nga tanuman sang palm oil subay sa pagpanalawsaw. Agdahon man niya ang ila mga kumpanya sa sekta sang oil palm nga tan-awon ang sarang mahimo sa pagpalapad sang negosyo sa duog, ini ang iya ginhambal sang siya nagbisita sa probinsiya sining karon lang.

Hambal pa ni Saad nga mga pila ka negosyante ang naghimo sang pagmangkot kag nagpabutyag nga magbutang sang kapital sa duog kag gamiton ang mga pamaagi sa negosyo kag pagbutang sang pondo sang Brunei, Indonesia, Malaysia, Philippine –East ASEAN Growth Area (BIMP-EAGA).

Pinaagi sa pamaagi sang BIMP-EAGA, ang Department of Agriculture kag Department of Environment and Natural Resources nagahimo sang pagpahayag sa mga opisyal sang negosyante sang Malaysia para sa tuyo nga pag-agda sang mga negosyuhan sa agrikultura sa Mindanao.

Subay sa listahan sang talatapan sang South Cotabato provincial agriculturist nagapakita nga may ara mga 10,000 hektarya sang duta sa banwa sang Lake Sebu kag mga 5,000 ka hektarya sa Siyudad sang Koronadal ang nakit-an nga puwede kag andam nga produktuhan sang palm oil.

Mahibaluan nga ang Malaysia nagaprodukto sang mga 45 porsiyento sa bug-os nga kalibutan sang palm oil kag ginakabig nga ikaduha sa pinakadaku nga nagaprodukto sang palm oil sa Indonesia, nagapati ang gobyerno probinsiya nga ang pagtanyag sang duta nga pagatamnan para sa palm oil nga negosyo makabulig padaku sa palaabuton nga industriya sa duog.

Si provincial agriculture technologist Pat Busarang nagsiling nga ang probinsiya mangin sunod nga Sabah, kon sa diin ginakabig nga pinakadaku nga nagaprodukto sang crude palm oil kag nagaamot sang mga sobra 30 porsiyento sang kabug-usan nga palm oil nga ginapadala sa guwa sang Malaysia.

Siling pa ni Busarang nga sa subong may ara mga bag-o nga talamnan sang palm oil sa probinsiya sa nanubuan nga parti sang banwa sang Tantangan kag Norala. Sa kabug-usan ang probinsiya may ara natanuman nga mga 1,229.38 ka hektarya nga talamnan sang palm oil. Ini nagalapta sa Siyudad sang Koronadal kag sa lima ka banwa sang probinsiya. (EBdelaCruz/PIA12)