Hiligaynon news: GenSan ginpabaskog ang pagpanilag sang dengue sa 14 ka duog

Thursday 5th of July 2012

KORONADAL CITY, Hulyo 5 (PIA) -- Maid-id nga ginabantayan sang gobyerno siyudad sang General Santos ang 14 ka duog tungod sa pagsaka sang kaso sang makapatay nga dengue hemorrhagic fever.

Si Dr. Mely Lastimoso, puno sang epidemiology and surveillance sang City Integrated Health Services Office (CIHSO), nagsiling nga subay sa ila pagpanilag nga kadamuan sa napamatud-an nga kaso sang dengue sa siyudad sang nagligad nga anum ka bulan nagaguwa nga mga 14 ka duog nga ara sa 26 ka barangay sang siyudad.

Siling pa niya nga ang nagapanguna sa listahan amo ang barangay Labangal, San Isidro, Lagao, Dadiangas North, Calumpang kag Mabuhay nga may ara natabo nga pagkapatay nanungod sa kaso sang dengue sugod sang Enero.

Hambal pa ni Lastimoso nga ginpataas man nila ang dengue alert sa Barangay Apopong, Fatima, Bula, Dadiangas West, City Height, Tambler, Baluan kag Buayan tungod sa may ara natabo nga mga kaso sang sakit nga dala sang lamok.

Hasta sang Hunyo 30, ang Department of Health 12 epidemiology and surveillance unit nakalista sang napamatud-an nga kaso sang dengue sa siyudad nga nag-abot sa 193 o kon apat ka porsiyento ang kanubuon sang nagligad nga tuig nga numero.

Pero ang siyudad sang General Santos nakalista sang anum ka kaso sang pagkapatay nanungod sa dengue o kon sobra duha sa napamatud-an nga napatay sang amo man nga tion sang nagligad nga tuig.

Siling pa ni Lastimoso nga ang gobyerno siyudad padayon ang maid-id nga kampanya kontra sa dengue sa siyudad, nga nakapuntirya sa DOH’s 4-S nga pamaagi kontra sa dengue.

Mahibaluan nga ang bug-os nga rehiyon 12, ang napamatud-an nga kaso sang dengue halin sang Enero hasta Hunyo 30, nag-abot na sa 1,470 o kon may ara lang duha ka porsiyento ang pagnubo halin sa kabug-usan nga hitabo sa amo man nga tion sang nagligad nga tuig.

Sa kabug-usan sang rehiyon 12, ang North Cotabato ang may ara madamo nga hitabo sang kaso sang dengue nga mga 592. Ginsundan sang South Cotabato nga may ara 270 ka kaso, Siyudad sang Cotabato nga may 224, Siyudad sang General Santos nga may ara 193, Sarangani mga 104 kag probinsiya sang Sultan Kudarat nga mga 87 lang ka kaso. (EBdelaCruz/PIA12)