Hiligaynon news: DA igapatuman ang kabug-usan nga paggamit sang makinarya

Thursday 5th of July 2012

KORONADAL CITY, July 5 (PIA) -- Magpatuman ang Department of Agriculture (DA) sang medium-term national farm mechanization and postharvest program para matagaan higayon ang mga mangunguma nga makatanum sang madamo nga mga talamnon kag mabuhinan ang pagkapiyerde sini.

Ginapangunahan sa subong ang Makina-Saka 2012 o kon ang 2nd Agri Machinery Roadshow , umpisa sa Hulyo 4 hasta sa 7, 2012 sa World Trade Center, sa Siyudad sang Pasay sa pagpakita sang mga bag-o nga gamit sa uma sa pagprodukto kag mga makina nga magamit pagkatapos sang patubas kag galamiton kag teknolohiya.

Ang apat ka adlaw nga buluhaton magpakita sang mga nadangatan sang nagligad nga tuig nga 1st Agri Machinery Roadshow, tungod ang dumalahan ni Presidente Benigno Simeon Aquino III pinaagi sa DA magpatuman sang kabug-usan mga buluhaton sa paggamit sang makina sa panguma kag pangisda, isa sa nagapanguna nga hilikuton para makab-ot ang bastante nga bugas kag mga nagapanguna nga kalan-on pagkatapos sang 2013.

Ang Makina-Saka 2012 maghiwat sang paghinun-anon kag mga workshop sa mga Irrigators’ Association sa pungsod, Small Water Impounding Systems Association (SWISAs) kag iban pa nga mga hugpong kag mga mangunguma kag sang Agricultural Fisheries Council (AFCs).

Si Presidente Aquino mangin halangdon nga manogpamulong-pulong subong nga adlaw, Hulyo 5 kag ihatag sa iya ang mga sulundan nga papeles sa Food Staples Sufficiency Program (FSSP) ni secretary Proceso Alcala kag mga hugpong sang mga mangunguma.

Ang FSSP isa sa nagapanguna nga buluhaton sang gobyerno Aquino nga may tuyo nga makab-ot ang bastante nga bugas kag mga nagapanguna nga mga kalan-on, pagpadaku sang produkto kag kita sang mga magagmay nga mangunguma kag mangingisda, tagaan gahum ang mga duog sang ginaumahan kag pangisdaan, kag mangin makakumpetensiya sa bug-os nga kalibutan ang sekta sang agrikultura kag pangisda.

Sa amo man nga pagtililipon, si secretary Alcala magapirmahanay man sang memorandum of agreement kay Science and Technology secretary Mario Montejo sa pag-inupdanay sang DA kag DOST sa mga buluhaton nga magimo nga mapaayo ang pagpanalawsaw kag pagpauswag sa paggamit sang makina sa panguma.

Pagatambungan man ni Presidente Aquino ang pag-umpisa sang “Matuwid na D.A.A.N.” web o kon Department of Agriculture Accountability Network, isa ka web portal nga makahatag sa katawhan sa pagpahapos nga makasugpon sa mga ihibalo sa nagkalain-lain nga sa subong kag natapos na nga mga buluhaton sa inprastraktura kag iban pa nga mga kaugalingon nga giho. (DED/EBdelaCruz-PIA12)