Hiligaynon news: DOH-12 ginaduso ang pagpaayo sang South Cotabato provincial hospital

Thursday 28th of June 2012

KORONADAL CITY, Hunyo 28 -- Ginaduso sa subong sang Department of Health (DOH) – Rehiyon 12 ginaduso ang pagkaayo sang South Cotabato provincial hospital sa siyudad sang Koronadal nga mangin regional-level nga pasilidad para mabuligan nga makahatag sang madamo pag-alagad sa ikaayong lawas sa duog.

Si South Cotabato Gov. Arthur Y. Pingoy Jr., nagsiling nga mga opisyal sang DOH-12 nagbuko sa paghulag parti sang ila padayon nga buluhaton para mapaayo ang pag-alagad sang mga ospital nga ginapalakat sang mga gobyerno lokal kag pagtukod sang iban pa nga mga pasilidad sa ikaayong lawas, nga ang isa amo man ang regional drug rehabilitation and treatment facility.

Nakighisayranay man si Pingoy sa kay DOH-12 director Dr. Marlyn Convocar sining karon lang sa pagtililipon sang Regional Development Council’s social development committee, nagsiling nga ang ahensiya nagpasayod nga makigtuwang sa gobyerno probinsiya para sa pagpauswag sang drug facility sa duog.

Siling pa niya nga ang DOH-12, nga nakabase sa Siyudad sang Cotabato, may tuyo nga abrihan ang regional drug rehabilitation and treatment center sa probinsiya tungod sa puwesto nga nahamtangan sang duog.

Hambal pa sang gobernador nga ang gobyerno probinsiya gilayon nagpabutyag sang pagsugot nga dire balayon ang ginabuko nga pasilidad kag maghatag bulig sa pagtukod kag pagpauswag sini.

Bilang sal-I sa ginabuko nga pagpakaayo sang provincial hospital, si Pingoy nagsiling nga gintanyag nila ang paggamit sang isa ka pasilidad sa ikaayong lawas sa probinsiya nga amo ang gamiton nga pasilidad sa druga.

Gintumod niya ang district hospital nga ara sa banwa sang Lake Sebu nga posible nga gamiton nga duog para sa drug facility.

Siling pa gid niya nga ang banwa sang Lake Sebu amo ang maayo nga duog para sa sini nga pasilidad tungod sa pinasahi nga kahamtang sang palibot kag sa mga natural nga talan-awon sa palibot nga makabulig sang pinasahi nga makaayo nga palibot para sa mga pasyente.

Hambal pa gid ni Pingoy nga ang pagkambiyo sang Lake Sebu district hospital nga mangin regional drug rehabilitation and treatment facility indi kapierdihan kundi positibo nga tikang sang gobyerno lokal tungod ini bug-os nga buligan sang DOH.

Magahatag man ini sang oportunidad sa duog tungod ang ginabuko nga DOH drug facility amo pa lang ang ikatlo sa bug-os nga pungsod.

Dugang pa sang gobernador nga ang DOH amo ang may daku nga katungod nga magpamatbat sa detalye sang buluhaton nga pagatukuron subay sa ila ginkasugtan nga pamaagi kag sulundan.

Mahibaluan nga ang DOH may tuyo nga magtukod sang mga pasilidad sa drug treatment and rehabilitation center sa nagkalain-lain nga parti sang pungsod para mabuligan sabat ang mga isyu nanungod sa druga kag mapapag-on ang pagpugong sa druga, malikawan kag ang pagpabalik liwat sa maayo nga kahimtang sang mga anay nakagamit sang ginadilian nga bulong nga pamaagi sang gobyerno. (EBdelaCruz/PIA12)