Hiligaynon News: South Cotabato nagbutang pondo nga mga P18-M para sa health insurance

By Edgar V. dela Cruz

Friday 15th of June 2012

KORONADAL CITY, June 15 (PIA) -- Ang South Cotabato naggasto sang mga P18 milyon subong nga tuig para sa siguro sa tiglawas sang mga 15,000 ka mga imol nga pamilya.

Si South Cotabato Gobernador Arthur Y. Pingoy Jr. kag ang mga opisyal sang Philippine Health Insurance Corporation XII (PhilHealth 12) sining karon lang nagpirmahanay sang memorandum of agreement (MOA) sa pagbag-o sang health insurance sponsorship program.

Nahibaluan ni Pingoy nga ang gobyerno probinsiya nakakuha sang kaayuhan sa ila pagpirmahanay sang MOA tungod wala sang pagsaka sang balayran nga pagabayaran sang gobyerno lokal hasta sa 2013.

Siling pa niya nga untani mga P1,400 pero ang gobyerno probinsiya nagbayad lang sang mga P1,200 para sa bug-os nga tuig nga balayran sang siguro sa panglawas sang kada manog-angkon sang kaayuhan.

Mahibaluan nga isa si Pingoy sa nagpirma sa 36 ka mga puno sang gobyerno lokal sa rehiyon XII nga nagsugot sang duha ka tuig nga lock-in period hasta sa 2013 sa PhilHealth.

Sa South Cotabato mahibaluan nga mga 92,000 ka mga may ara tarheta sang PhilHealth, ang mga 15,000 sini ang ginabayaran sang gobyerno probinsiya kag mga 53,000 ara sa idalum sang National Household Targeting System for Poverty Reduction, nga ang balayran ginasalu sang Pantawid Pamilyang Pilipino Program.

Mga 24,000 nga iban pa ginabayaran sang iban nga gobyerno lokal sa probinsiya kag ang iban sang sibiko kag pribado nga hugpong.

Sa mga binag-o nga katapo, mga 15,000 ka mga pamilya sa subong makaagum sang kabug-usan nga Primary Care Benefit pinaagi sa ila ginkilala nga Rural Health Unit nga gin-umpisahan sang nagligad nga Abril upod ang primary preventive nga pag-alagad, diagnostic nga pag-usisa kag libre nga mga bulong kag medisina.

Ang nagapanguna nga pag-alagad sa paglikaw upod ang libre nga pagpaausisa, visual inspection with acetic acid, pirme nga pagtan-aw sang blood pressure, buluhaton sa kaalam sa pagpasuso, paglaygay sa pag-untat sa pagpanigarilyo, pirme nga pag-usisa sang suso, paglaygay sa paglain sang estilo sa pangabuhi, pagtakus sang lawas kag digital recital nga pag-usisa.

Ang libre nga diagnostic nga pag-usisa upod ang kabug-usan nga blood count, pag-usisa sang ihi, tae, sputum micersocopy, fasting blood sugar, lipid profile kag xray sa dughan, samtang ang mga libre nga bulong ginapanghatag para sa asthma, acute gastroenteritis, upper tract infection kag urinary tract infection. (EBdC-PIA12)