Hiligaynon News: Gobyerno sang Sarangani, PCG mangusisa sa paghaboy sang higku sang uling sa baybay sang Sarangani

By Edgar V. dela Cruz

Friday 1st of June 2012

KORONADAL CITY, Hunyo 1(PIA) -- Magahimo sang imbestigasyon ang gobyerno probinsiyal sang Sarangani kag ang Philippine Coast Guard (PCG) sa ginapahayag nga pagpanghaboy sang higku sang uling sa baybay sang Sarangani sang isa ka barge kag tugboat halin sa Indonesia.

Si Rolando Tuballes, Sarangani environment and natural resources officer, nagsiling nga ang mga pumuloyo sa higad dagat sang Kapatan sa banwa sang Glan, Sarangani nagpahibalo sang nagligad nga mga inadlaw nga ang barge kag ang tugboat nga Oceana 1 kag 2 naghaboy sang ila nga higko sang sila temporaryo nga nagpundo sa dagat sining karon lang sa duog.

Siling pa ni Tuballes nga ila ginakilala ang tag-iya sang nasambit nga kasko kag tugboat nga suno sa report mga 11 ka mga tripulante sang barko halin sa Indonesia, Malaysia kag Myanmar.

Hambal pa ni Tuballes nga ang nasambit nga barko nagdungka sa Manila sining karon lang para magdul-ong sang uling pagkatapos naglayag pakadto sa Siyudad sang General Santos para magkuha sang mga karga.

Pero suno pa kay Tuballes nga ang barko nga untani magkuha sang karga sa Pantalan sang Makar, indi pa ini andam sang sila mag-abot gani nagpundo sila sa tunga sang lawod nga sakop sang Kapatan.

Siling pa niya nga samtang nagapundo ang kasko kag tugboat, nakita sang iban nga pumuloyo ang pagdagdag nila sang ila mga higku sa dagat.

Sa pagkabalaka sang mga pumuloyo ginkuhaan nila sang larawan ang pagpanghaboy sang higku sa parti sang baybay nga ginpahayag sang gobyuerno nasyunal nga ginapangapinan nga duog sang dagat.

Si Atty. Arnel Zapatos, legal officer sang Sarangani, nagsiling nga ang paghaboy sang higku nga butang sa Baybay sang Sarangani ginadumulian tungod ini ginapangapinan nga duog sa dagat.

Dugang pa ni Atty Zapatos nga nangayo na sila sang bulig sa PCG kag Department of Environment and Natural Resources sa pagpangusisa sa hitabo kag para mahibaluan ang posible nga salabton sang tag-iya kag tripulante sang kasko kag tugboat.

Mahibaluan nga ang Baybay sang Sarangani ginpahayag nga ginapangapinan nga dagat sang Marso 5, 1996 pinaagi sa Presidential Proclamation No. 756. (DED/EBDC-PIA12)