Hiligaynon news: Irigasyon, pinakadaku nga bulig sa pagkab-ot sang rice sufficiency sa 2013 -- Alcala

Friday 11th of May 2012

KORONADAL CITY, Mayo 10 (PIA) -- Siling ni Agriculture secretary Proceso Alcala nga ang irigasyon amo ang pinakadaku nga pagpanghilabot para makab-ot ang tuyo nga may ara bastante nga bugas sa 2013.

Hambal pa ni Alcala nga ang mga duta nga ginauma nga may ara irigasyon, may lima ka panahon sa pagtanum nga makab-ot sa sulod sang duha ka tuig sang sa isa ka tion sa pagtanum sa isa ka tuig sa mga wala irigasyon nga ulumhan.

Siling pa niya nga ini tungod wala sang makigsumpong sa daku nga bulig sang irigasyon, tungod kon ang duta wala irigasyon makatanum lang sang ka isa, samtang kon may irigasyon, padayon ang pagtubod sang tubig, makatanum sang ka lima sa sulod sang duha ka tuig.

Hambal pa gid niya nga sang siya ang nagadumala sang ahensiya, gingamit niya ang pondo sa pagkaayo sang mga pasilidad sang irigasyon.

Siling pa gid niya nga gintapos nila sang isa ka tuig, kag sa ikaduha ka tuig, gin-upod ang pagkaayo kag pagtukod sang bag-o nga mga irigasyon, upod ang pagkaayo sang mga daan na nga wala matandog.

Ginapanan-aw ni Alcala nga nagsobra sa ila ginapuntirya nga 191,000 ka hektarya sang mga duta nga patubigan sa subong nga tuig sang 2013 ang maplastar nga mauna.

“Ini ang maayo nga rason kon ngaa nagauswag ang pagkab-ot sa bastante sa kaugalingon nga may ara bugas,” siling pa ni Alcala.

Dugang pa niya nga sa kahimtang nga aton pagadangatan kag sa mga pamalabag nga ginahimo nakab-ot na ang pinakamataas nga patubas sang nagligad nga tuig, nga kon sa diin record breaker. Sang una kag ikaduha nga tatlo ka bulan sang tuig 2012, nakita nga nagsobra ang patubas subong nga tuig, kag ini matabo nga makab-ot ang 100 porsiyento nga may ara bastante nga kaugalingon nga bugas sa una nga puntirya nga tuig.

Tungod sini ang gobyerno, hambal pa ni Alcala nga nagaplano nga magpaguwa baligya sang bugas sa luwas sunod nga tuig tungod nagapamakal sang nagkalain-lain nga sahi sang bugas para makakumpetensiya kita sa mga balaligyaan sa bug-os nga kalibutan. (EBdelaCruz/PIA12)