Cebuano news: Pangulong Aquino mipahigayon og bilateral meeting uban ni Malaysian Prime Minister Najib Razak

Monday 10th of September 2012

ni Susil D. Ragas

SURIGAO CITY, Sep 10 (PIA) -- Ang Pilipinas ug Malaysia kagahapon Domingo (Vladivostok time) pareho nga mipabati og panginahanglanon aron makuha ang hiniusang posisyon sa Association of Southeast Asian Nations (ASEAN) kalabot na sa mga bikil sa pag-angkong sa West Philippines Sea.

Si Pangulong Benigno S. Aquino III nakigtagbo kang Malaysian Prime Minister Najib Abdul Razak atol sa gipahigayon nga Asia-Pacific Economic Cooperation (APEC) Leader’s Meeting didto sa Far Eastern Federal University sa Russkiy Island.

Atol sa ilang bilateral meeting, gituki sa duha ka mga lideres unsay buhaton aron mapauswag ang mga investments, trade, defense cooperation, lakip usab ang West Philippine Sea, ang ASEAN, ug ang Philippine government-MILF peace process.

Si Foreign Affairs Secretary Albert del Rosario, diin maoy usa sa mga opisyales sa gobyernong Pilipinas ang didto sa maong tigum, miingon nga parehong gipadayag sa duha ka mga lideres ang panginahanglanon aron mohimo og hiniusang posisyon sa ASEAN mahitungod sa away sa West Philippine Sea.

Ang Pilipinas, Malaysia, China, Brunei, Taiwan ug Vietnam adunay dugay nang mga pag-angkon sa West Philippine Sea.

“Both countries are on board in terms of the six principles that was agreed with ASEAN and so we are anxious to see how that can be moved forward,” matud ni Del Rosario atol sa interbyu kaniya sa mga miyembro sa Philippine media.

“Both leaders had expressed the need to be able to adopt a common position in ASEAN in terms of the challenges in the West Philippine Sea, and we are also together in terms of support for the forward movement of the Code of Conduct,” dugang pa niya.

Matud pa usab ni Del Rosario nga Si Pangulong Aquino ug Prime Minister abdul Razak parehong mipadayag sa ilang positibo nga pagtoo nga ang peace negotiations mahuman na gyud “in the next couple of months.”

Dugang pa ni Del Rosario nga atol ussab sa maong bilateral meeting, nipadayag usab si Pangulong Aquino sa iyang dakong pasalamat ngadto sa Malaysia sa pagka-epektibo niini nga kaagabay. Siya miingon nga si Prime Minister Abdul Razak mipadayag usab sa iyang tinguha nga siya mosaksi kon ugaling mapirmahan na ang maong peace agreement.

Samtang mahitungod sa trade and investments, matud ni Del Rosario, adunay mga trade ug investments initiatives sa Kuala Lumpur ug Hongkong ug kini nga mga inisyatibo “will try to move the many opportunities offered between the two countries in terms of enhancing bilateral trade and investments.”

Luyo kang Secretary del Rosario, didto usab sa maong bilateral meeting sila Finance Secretary Cesar Purisima, Energy Secretary Rene Almendras, Trade Secretary Gregory Domingo, Socioeconomic Planning Secretary Arsenio Balisacan, ug Presidential Spokesperson Edwin Lacierda. (RER/SDR-PIA13 Surigao del Norte)