Cebuano news: Aquino mapasalamaton sa mga volunteers sa gihimo niini nga pagtabang pagpreparar og family food packs alang sa mga biktima

By Susil D. Ragas

Monday 13th of August 2012

SURIGAO CITY, Agosto 13 (PIA) –Gipadayag ni Pangulong Benigno S. Aquino III kagahapon Domingo ang iyang dakong pasalamat ngadto sa liboan ka mga estudyante ug mga propesyunal nga miboluntaryo sa ilang oras aron morepake ug moapod-apod sa mga family packs aron matabangan ang mga pamilya nga naapektuhan sa mga pagbaha.

Atubangan sa mokabat 700 ka mga volunteers nga busy nagrepake sa mga nagkalain-laing mga produkto sa pagkaon nga sa dili madugay ipang-apod-apod ngadto sa mga biktima didto sa National Resource Operation Center sa Department of Social Welfare and Development didto sa Pasay City, matud pa sa Pangulo nga panahon na aron mapasalamatan ang maong mga volunteers, diin pinaagi sa ilang mga paningkamot, aron maipakita sa ilang isig ka Filipino ang pagmahal ug pagbate nga wala sila mag-inusara.

“‘Yung lahat ng natulungan nating mga kababayan…‘pag natatanggap po itong mga relief packs na hinanda niyo, nadarama nila ang pagmamahal ng kapwa nila Pilipino. Nadarama nilang hindi sila nag-iisa, may kadamay sila sa trahedyang ito,” matud pa sa Pangulo.

“Ako naman po, sa mga volunteers, gusto ko lang i-acknowledge kayong lahat,” dugang pa niya.

Pipila sa mga volunteers ang mga miyembro sa nagkalain-laing mgaorganisasyon sama sa Pag-asa Youth Association of the Philippines: University of Perpetual Help, Las Piñas campus; Samahan ng mga Kababaihan ng Antipolo City; Federation of Student Government of Makati; Asian Institute of Management; Philippine Star; Gatos and Reyes family; Philippine Air Force; Union Transport Incorporated Shared Services;

Camp Crame Police Community Relations; University of Makati; Globe; Kababaihan Truly Cares; Our Lady of Airways Parish Church; Life Faith in Jesus Ministry; Office of Pasay City Hall; Civil Defense Action Group ug ang I-Serve Quezon City; Calixto Forever Movement; Pantawid Pamilya beneficiaries sa Barangay 196 Parañaque; Salsatrends Urdaneta Makati; Don Bosco, Muntinlupa; ug 7-11.
Ang Pangulo miingon nga matud DSWD, ang mga volunteers nakarepake na og mokabat 129,170 ka mga food packs uban ang 101,338 nga naapod-apod na ngadto sa mga biktima.

“Sa ngalan ng sambayanan, maraming-maraming salamat po. Kapag may trahedya doon natin nakikita ang kagalingan ng Pilipino...kung saan ang kapwa nagmamalasakit sa kapwa. Ulit, sa ngalan po ng bansa, sa ngalan po ng ating mga kababayan, talagang malaking-malaking pasasalamat po sa bawat isa sa inyo,” sa iyang panapos nga pamahayag. (PIA-Surigao del Norte)