Cebuano news: Coloma nakigtagbo sa Philippine team alang sa ASEAN Quiz didto sa Cambodia

By Susil D. Ragas

Wednesday 1st of August 2012

SURIGAO CITY, Agosto 1 (PIA) -- Gitagbo ni Presidential Communications Operations Office (PCOO) Secretary Herminio “Sonny” Coloma Jr. kagahapon ang mga miyembro sa Philippine delegation nga mosangka sa 5th ASEAN Quiz didto sa Phnom Penh, Cambodia, karong Agosto 1 hangtod 5.

Ang upat ka miyenbro sa Philippine delegation naglakip nila Francesca Ann Inacay, St. Albert the Great School, Dagupan City; Krystianne Paul de Pedro, Koronadal Comprehensive High School, koronadal City; Maria Angela Krizelle Rubin, San Joaquin National High School, Calbayog, Samar, lakip usab si Elenita Directo sa PTV4, isip head sa deleagsyon.

Ang Philippine quiz team, nga mobiyahe paingon ngadto sa Cambodia karong adlawa Agosto 1, giubanan sa ilang mga coaches ug school officials atol sa ilang panagtagbo uban kang Coloma.

“We have very high hopes for you. You will be carrying the colors of the country and not just your schools,” sulti ni Coloma sa dihang iyang gipadayag ang iyang best wishes alang sa Philippine team.

Isip paghatag suporta ug pagpakusog sa kumpiyansa sa mga partisipante, si Coloma miingon nga ang mga Filipino adunay talagsaon nga mga talento nga pwedeng ikasukol o makapildi sa laing mga nasod. Matud pa niya nga ang kumpetisyon sa Cambodia maoy panahon alang sa mga estudyante aron modaog ug ipakita ang ilang mga talento.

Ang quiz competition didto sa Cambodia sundon lang gihapon ang pareho nga pormat nga gigamit sa Pilipinas sa dihang ang nasod maoy mipasiugda sa regional competition niadtong tuig 2009. Lakip na niini ang individual country competition (formal competition) ug friendly group competition (game show competition).

Ang tulo ka mga estudyante nga mopartisipar didto sa Cambodia quiz bee mao ang mga midaog sa national quiz tilt nga gipahigayon didto sa PTV4 niadtong Enero karong tuiga.

Ang national competition gipasiugdahan sa buhatan sa PCOO, PTV4, Philippine Information Agency (PIA) ug BBS sa pakigtambayayong sa Departmernt of Foreign Affairs (DFA) ug ang Department of Education (DepEd).

Ang ASEAN Quiz, gisugdan isip proyekto sa ASEAN Committee in Culture and Information (COCI) niadtong tuig 2002, kini usa ka biannual competition nga gipartisiparan sa mga estudyante gikan sa 10 ka mga miyembrong nasod sa ASEAN.

Kini nagtumong aron ipagawas ang diwa sa healthy competition sa mga kabataan sa ASEAN pinaagi sa friendly quiz game aron ipasiugda ang kahibalo ug pagsabot sa mga tahas sa ASEAN aron makab-ot ang kalinaw sa rehiyon, panaghiusa ug kooperasyon.

Ang maong kumpetisyon nagtumong usab aron ipasiugda ang ASEAN awareness sa publiko ug aron dasigon ang pribadong sector sa pagpartisipar sa maong kalihukan.

Ang quiz, nga diin maoy inisyatibo sa Pilipinas pinaagi sa COCI sub-committee on information, kini nahilakip sa memorandum of understanding (MOU) nga gipirmahan sa mga ASEAN Ministers Responsible for Information niadtong Oktubre 2000.

Ang ASEAN National Committee on Culture nga naglangkob sa mga representante gikan sa PCOO, PIA, PTV, DFA, CCP ug NCCA gipasiugdahan ang national competition aron mokuha og mga partisipante alang sa maong kalihukan didto sa Cambodia. (RER/SDR-PI13 Surigao del Norte)