Cebuano news: Filipina surfing sensation mosangka sa int’l tilts

Wednesday 1st of August 2012

GENERAL LUNA, Siargao Island, Agosto 1 (PIA) -- Andam ug kondisyon na ang Filipina surfing sensation nga si Nilbie Blancada nga mosangka alang sa umaabot nga international competitions karong tuiga ug sa mosunod nga tuig sa laing mga nasod.

Human nga malamposon niyang nakuha ang kadaogan sa duha ka international crowns sa managlahi nga mga titulo sa surfing, si Blancada mohulma sa iyang ngalan sa surfing circle isip usa sa pinakamaayong surfers sa Pilipinas.

Siya midaog sa international surfing competition niadtong Mayo didto sa Siargao Island samtang iyang naangkon ang iyang pinaka-unang kadaogan gawas sa nasod didto sa West Java, Indonesia niadtong Hunyo.

Si Blanca nga moedad 20-anyos karong umaabot nga Agosto 4, natawo ug nagdako sa General Luna, Siargao Island ang surfing mecca sa nasod, sa wala pa niya makuha ang mga international titles, nakaangkon na siya og mga national titles sa mga national competitions nga gipahigayon niadtong miaging tuig sama didto sa Cantilan sa Surigao del Sur; Baler, Aurora; Samar, Leyte ug didto sa probinsya sa La Union.

Siya mosalmot sa sunod nga international surfing competition karong Septeyembre niining tuiga didto sa Thailand ug Bali, Indonesia. Siya usab mosangka karong Febrero tuig 2013 didto sa Australia. (RER/SDR/Roel N. Catoto/PIA13 Surigao del Norte)