Cebuano news: Aquino giduso ang modernization plan alang sa Armed Forces of the Philippines

By Susil D. Ragas

Tuesday 24th of July 2012

SURIGAO CITY, Hulyo 24 (PIA) -- Giduso ni Pangulong Benigno S. Aquino III ang modernisasyon sa armadong kusog sa nasod aron mahimo niini ang pagtubag sa modern-day challenges.

Sa iyang ikatulong State of Nation Address kagahapon Lunes human sa Joint Session sa 15th Congress didto sa Batasang Pambansa sa Quezon City, ang Pangulo miingon nga ang iyang administrasyon nakahimo na sa pag-alokar og P28 bilyon sulod lamang sa duha katuig alang sa Modernization Program sa Armed Forces of the Philippines.

Ang kantidad nga gi-alokar sa administrasyong Aquino hapit motugbang sa P30 bilyon nga budget sa niaging administrasyon sulod sa milabayng 15 years, matud sa Pangulo

“Bumubuwelo pa lang po tayo sa lagay na ‘yan: kapag naipasa na ang panukala nating AFP modernization bill sa Kongreso, makakapaglaan tayo ng P75 bilyon para sa susunod na limang taon,” matud pa niya.

“Kasado na rin po ang tatlumpung milyong dolyar na pondong kaloob ng Estados Unidos para sa Defense Capability Upgrade and Sustainment of Equipment Program ng AFP. Bukod pa po ito sa tulong nila upang pahusayin pa ang pagmanman sa ating mga baybayin sa ilalim ng itatayong Coast Watch Center ng Pilipinas,” dugang pa niya.

Ang Pangulo miingon usab nga ang AFP misugod na sa pagpalit og mga modernong mga ekwipo sama sa cannons, armored personnel carriers ug frigates dugang pa niini usa ka warship gikan sa US ang moabotay karong Enero.

Ang BRP Ramon Alcaraz, ang ikaduhang Hamilton class cutter sa nasod moabot sunod tuig, matud niya. Sa niaging tuig, ang Philippine Navy gikomisyon ang BRP Gregorio del Pilar aron bantayan ang Philippine waters.

Duha ka C130 cargo aircraft ang mopataas usab sa airlift capabilities sa Philippine Air Force, ang Pangulo miingon. Kini ang motabang sa single C-130 nga nag-operate na sulod sa 30 ka tuig.

Ang Pangulo miingon nga sa sunod tuig, adunay 21 ka refurbished UH-1H Helicopter ang edeliver ngadto sa air force, isip dugang sa upat ka combat utility helicopters, radio ug ekwipo sa komunikasyon, rifles, mortars, mobile diagnostic laboratories ug bullet station assembly.

Samtang gihatagan sa gobyerno og ekwipo ang mga sundalo ug polis, gipaningkamutan usab sa administrasyon nga mahimong mamaayo ang ilang mga kinabuhi.

Mokabat sa 22,000 ka mga balay ang gitukod sa gobyerno pinaagi sa AFP-PNP housing program, matud niya.

“Hindi po ito tungkol sa pakikipaggirian o pakikipagmatigasan. Hindi ito tungkol sa pagsisiga-sigaan. Tungkol ito sa pagkamit ng kapayapaan. Tungkol ito sa kakayahan nating ipagtanggol ang ating sarili—isang bagay na kay tagal nating inisip na imposible,” Matud pa niya.

Ang mga paningkamot sa gobyerno alang usab sa pagprotektar sa mga kinabuhi sa mga sundalo ug polis aron mahimong luwas ang ilang mga trabaho alang sa benipisyo sa ilang mga pamilya, sa panapos nga sulti sa Pangulo. (RER/SDR/as-PIA13 Surigao del Norte)