Cebuano news: Malacañang naglaom nga uyonan sa China ang ASEAN consensus alang sa pagresulba sa mga claims sa West Philippine Sea

By Susil D. Ragas

Thursday 12th of July 2012

SURIGAO CITY, Hulyo 12 (PIA) -- Ang Malacañang naglaom nga uyonan sa Peoples Republic of China ang bag-ong consensus sa Southeast Asian Nations (ASEAN) nga ang United Nations maritime convention maoy himoong basehan sa pagresulba sa mga tagsa-tagsa ka mga pag-angkon sa West Philippine Sea.

Ang mga ASEAN foreign ministers nga nagtagbo didto sa Cambodia karong semanaha nagkauyon sa paghimo ug dokumento alang sa malinawon nga pagresulba sa giawayan nga teritoryo.

“In the first instance, China has also been of the position that it should be settled peacefully. Everybody is agreed on that. We hope that they will be receptive to the idea as well,” sulti ni Deputy Presidential spokesperson Abigail Valte atol sa regular press briefing kagahapon Miyerkules didto sa Malacañang.

“Let’s see kung sa November ita-target na mailabas yan. Hopefully, it will be received well,” sulti ni Valte mahitungod sa pagpagawas sa maong dokumento karong Nobyembre.

Si Valte mipasabot nga ang posisyon sa nasod mao ang pagduso sa ASEAN centrality ug ang code kinahanglang himoon una sa dili pa awhagon ang laing nasod sa pagduyog sa Code of Conduct.

Sa dihang gipangutana kung ang Palasyo nagtoo nga ang Code of Conduct makapakusog sa posisyon sa Pilipinas sa West Philippine Sea, si Valte miingon, “We have been firm that ‘yung claim natin doon is supported under international law and that we intend to pursue our claim under a rules-based approach.”

Ang maong dokumento naglangkob sa panawagan sa regional block nga kinahanglan ang duha ka mga nasod mohimo pagresulba sa maong territorial dispute didto sa West Philippine Sea sa malinawon nga paagi, subay sa international law lakip ang UN Convention on the Law of the SEA o UNCLOS.

Ang UNCLOS usa ka international treaty nga nagtakda og mga limitasyon kon unsaon sa silingang mga nasod pagkonsiderar sa ilang mga exclusive economic zones. Ang China usa sa mipirma sa maong UNCLOS.

Atol sa ASEAN Summit niadtong bulan sa Abril, ang Pilipinas miingon nga ang ASEAN kinahanglan magkauyon una ang matag miyembro niini sa gihimong dokumento sa Code of Conduct of Parties in the West Philippine Sea (South China Sea) sa dili pa makigtagbo sa China. Ang isyu sa West Philippine Sea kinahanglan maresolba nga malinawon subay sa international law, matud niini.

Ang Taiwan ug mga miyembro sa ASEAN, sama sa Pilipinas, Vietnam, Brunei ug Malaysia adunay mga claims sa West Phillippine Sea. Ang maong teritoryo nga giawayan gituohan nga adunay dakong deposito sa oil ug gas. (RER/FEA/PIA 13-Surigao del Norte)