Cebuano news: Gobyerno padayon ang suporta alang sa K+12 nga programa sa DepEd

By Susil D. Ragas

Wednesday 6th of June 2012

SURIGAO CITY, Hunyo 6 (PIA) -– Gidepensahan sa administrasyong Aquino ang lakang niini aron pag-implementar sa K+12 nga programa sa edukasyon sa Department of Education karong tuiga ingon nga ang bag-ong inisyatibo makatabang nga makunhoran ang unemployment rate sa nasod, matud sa opisyales sa Palasyo.

Si Presidential Spokesperson Edwin Lacierda mipagawas sa maong pamahayag atol sa regular press briefing didto sa Malacañang kagahapon taliwala sa mga taho nga pipila ka mga grupo ang miawhag kang Pangulong Benigno S. Aquino III nga erekonsiderar ug dili usa ipa-implementar ang K+12 program.

Si Lacierda miingon nga nakasabot ang gobyerno sa reaksyon sa pipila ka mga grupo. “There have always been resistance to something new. But as we go along, we will able to adjust to that,” sulti ni Lacierda.

Ang administrasyon positibo nga sa ngadto-ngadto suportahan sa publiko ang bag-ong inisyatibo nga nagtinguha sa pagpauswag sa sistema sa edukasyon sa nasod, matud ni Lacierda.

Ang K+12, nga gilantaw sa DepEd, nagtinguha usab aron moprodyus og mga gradwadong high school nga adunay igong abilidad aron makakuha og trabaho ug aron sila mapreparar alang sa kolehiyo.

"Should these highschool graduates decide not to pursue college studies, they will still be able to find employment opportunities after highschool," sulti ni Lacierda.

Ang pag-abli sa mga klase karong tuiga maoy unang implementasyon sa programa sa K+12. Atol sa pag-abli sa mga klase kagahapon Hunyo 4, moabot sa 21.49 milyon ka mga estudyante sa mga pampublikong eskuylahan ang gidawat sa DepEd.

Si Lacierda usab mipasalig nga ang gobyerno naningkamot aron matubag ang problema sa kakulangon sa mga klasroms. Sa paglingkod ni Pangulong Aquino niadtong tuig 2010, aduna nay kakulangon nga mosobra sa 60,000 ka mga klasroms dinhi sa nasod.
Ubos sa administrasyong Aquino, ang gobyerno nakahimo na sa pagtukod og 10,000 ka mga klasroms ug dugang pang 30,000 klasroms karong tuiga uban ang tabang sa nagkalain-laing mga sector.

Si Lacierda miingon ang gobyerno mihimo sa tanan aron mapadali ang pagtukod og dugang mga klasroms aron matubag ang kakulangon. (PIA-Surigao del Norte)