Cebuano News: Libohan ka seedlings gitanum sa Alabel, Sarangani

By Nirvana Alpha Vita G. Fruylan

Wednesday 4th of July 2012

SYUDAD SA HENERAL SANTOS, Hulyo 4 -- Mokabat sa tres mil tres syentos ka mga seedlings sa kahoy nga goma ug mahogany ang gitanom tong nilabay’ng semana sa Calminda watershed sa munisipyo sa Alabel, Sarangani.

Sumala pa sa taho gikan sa Public Information Office (PIO) sa probinsya, dos mil ka mga rubber seedling ang migikan sa Development Bank of the Philippines kon DBP, ug ang usa ka libo nga lubang sa goma ug tres syentos ka seedling sa mahogany gikan sa lokal nga panggamhanan sa probinsya.

Matud pa ang naasoy nga pagpananom ug kahoy gipahigayon isip pagsaulog sa Environment Month karong tuiga kung asa tumong niini nga madasig ang mga komunidad aron makamugna ug aksyon alang sa pagprotekta sa kinaiyahan.

Usa ang Calminda watershed, nga nahamutang sa bukiron nga dapit sa Barangay Paraiso, sa gilaumang ma protektahan sa lokal nga panggamhanan sa Sarangani pinaagi sa pagpananom ug kahoy sa maong lugar aron ma preserba ang usa sa kakuhaan ug tubig sa probinsya

Gisalmotan ang nasampit nga kalihokan sa mga bolunter gikan sa pribadong sektor, mga magtutungha sa hayskol, ug mga empleyado ug opisyales sa gobyerno apil na ang mga kapulisan ug kasundalohan gikan sa 73rd Infantry Battalion. (PGFruylan/PIA-Gensan)