Cebuano news: Philippine Business Registry ilusad sa Rehiyon Dose

Thursday 24th of May 2012

GENERAL SANTOS CITY, Mayo 24 (PIA) -– Ilusad karong adlawa sa Department of Trade and Industry (DTI) 12 ang Philippine Business Registry (PBR) sa rehiyon nga ipahigayon sa National Economic Research and Business Assistance Center (NERBAC) 12 dinhi sa dakbayan isip lakang aron mapadali ang pagpahigayon ug mga transaksyong pang negosyo sa rehiyon alang sa ekonomikanhong kalamboan.

Gibutyag ni DTI 12 Regional Director Ibrahim Guimadel nga ang PBR usa ka proyekto sa gobyerno nga naglaum sa pagpatigayon ug paspas nga proseso sa pagpa rehistro sa mga negosyo pinaagi sa paghiusa sa mga nagkalain-laing ahensya sa gobyerno sa usa ka gitawag “web-based system.”

Matud pa ni Guimadel ang PBR mamahimong usa ka “virtual one-stop-shop” alang sa mga magnenegosyo nga gikinahanglan nga magpahigayon ug transaksyon sa pipila ka mga ahensya sa gobyerno una sugdan ang ilahang mga negosyo.

Samtang gikanayon ni NERBAC 12 Chief Ethel Laksmi Gumana nga human masugdan sa rehiyon ang PBR mapadali na ang pagpahigayon ug transaksyong pang negosyo tungod nga mamahimo ng makapa rehistro ang mga bag-ong negosyo pinaagi sa internet.

Sumala pa niini gihiusa sa PBR ang tanang buhatan sa gobyerno nga apil sa pag –isyu ug permit kon lisensya sa pag negosyo sama sa DTI, Bureau of Internal Revenue, Securities and Exchange Commission, Social Security System, Pag-IBIG, PhilHealth, Local Government Unit, ug uban pang ahensya aron mapadali ang pagpahigayon ug transaksyon isip pagpakita sa pagkugi sa gobyerno aron makahatag ug de-kalidad nga serbisyo alang sa katawhan.

Dugang pa ni Gumana gi-disenyo sab ang PBR isip usa ka “database” sa mga rehistradong negosyo sa tibook nasud nga mahinungdanon gayod sa pagbuhat ug “statistical reporting” ug “business matching.”

Matud pa niini mas dali na alang sa usa ka kompanya nga mangita ug suplayer sa panginahanglanong pang-negosyo niini pinaagi sa PBR.
“Mamahimo nilang bisitahon ang website nga www.business.gov.ph alang sa dugang impormasyon may kalabotan sa PBR,” segun pa niini. (PGFruylan/PIA-Gensan)