Cebuano news: Proyektong enerhiya pinaagi sa kasubaan sa Kitaotao gilantaw nga makatabang sa kakulang sa kuryente sa Mindanao—Hedcor

By Ruby Leonora R. Balistoy

Sunday 20th of May 2012

MALAYBALAY CITY, Bukidnon, May 20 (PIA) -- Ang Hedcor Bukidnon, Inc. ug ang lokal nga kagamhanan sa Kitaotao ning probinsya sa Bukidnon, kamulo na nga nagapahigayon ug mga kalihukan alang sa katukuran sa usa ka “hydroelectric plant” diin gikaingon nga makatabang usab sa kasulbaran sa kakulangon sa kuryente sa Mindanao diin kanunay nalang nga gakahitabo panahon sa bakasyon kon "summer."

Gregorio Jabonillo, Vice President sa Business Development sa Hedcor, miingon nga kining proyekto ginamit ang natural nga kusog sa suba sa Sita ug Simod nga anaa nahimutang sa Kitaotao, Bukidnon, adunay kapasidad nga makapagawas ug 28.2 ka megawatts nga enerhiya.

“Sumala sa nahitala, ang Kitaotao "hydro power" nga proyekto, kon makumpleto, mohatag kini ug 160 ka milyon nga kilowatt hours matag tuig, diin makatabang usab sa pagsulbad sa kakulang sa kuryente sa Mindanao,” matud niya.

Samtang, sa iyang pakigpulong atol sa pagpinirmahay sa Memorandum of Agreement sa nasangpit nga proyekto, si Kitaotao Mayor Rodito Rafisura miingon nga mosamot ang problema sa kakulang sa kuryente kon ugaling walay madugang dayon nga tinubdan sa enerhiya.

“Ang Mindanao man gud, naga salig ug maayo sa suplay nga nagagikan sa Agus sa Lanao ug sa Pulangi dinhi sa Bukidnon. Tungod niini, kon moabot ang panahon nga taas ang hulaw ug ting-init ug gamay ra kaayo ang ulan, ang produksyon sa duha ka nasangpit nga planta mogamay nga maoy hinungdan sa taas nga oras sa ‘brownout’ dinhi sa Mindanao,” dugang sa mayor.

“Sumala sa mga taho, 52 por syento sa total nga suplay sa kuryente sa Mindanao, nagagikan sa Agus ug Pulangi nga planta. Ug adunay mga panglantaw sa mga eksperto nga sa tuig 2014, ang kakulangon sa kuryente mokabat na unya sa sobra sa 400 ka megawatts,” pahayag niya.

“Busa, matud sa mayor, sa dili pa kini mahitabo, ang Hedcor ug ang local nga kagamhanan sa Kitaotao, nagtinguha nga makab-ot kini nga proyekto,” dugang sulti sa mayor.

usab si Mayor Rafisura pag-ingon nga ang Bukidnon, isip tinubdan kon “host” nga probinsya sa maong proyekto, maka benepisyo kini sa kita kon "generation shares," serbisyo sa maayong panglawas, mga kalsada kon “farm-to-market roads," ug mga oportunidad sa panginabuhian kon "livelihood" pinaagi sa Hedcor nga mga serbisyo.

Ang Hedcor usa ka sanga nga kompaniya ubos sa pagdumala sa Aboitiz Power Corporation nga maoy pinakadako nga tigpahigayon kon “developer” sa mga suba aron maka himo sa ‘hydroelectric power plant’ sa tibuok nasud. Gani aduna na kini’y 19 ka mga hydro power nga mga planta ditto sa Benguet, Ilocos Sur, ug Davao. (PIA 10, Bukidnon)