Cebuano news: Internet subscription sa Rehiyon 10 misaka sa 9.67% sa unang kwarter sa tuig

By Rutchie C. Aguhob

Sunday 2nd of September 2012

OROQUIETA CITY, Misamis Occidental, Set.2 (PIA) -- Mikabat kapin sa 24,132 ka nagbayad sa linya sa telepono kun telephone subscribers ang nagpataod ug internet connection dinhi sa Amihanang Mindanao sa unang kwarter sa tuig.

Kini, adunay pagsaka ngadto sa duolan diyes porsento (9.67%) itandi ngadto sa kapin 22,005 sa susamang panahon sa milabay nga tuig, matud pa ni Engr. Teodoro Buenavista Jr. sa National Telecommunications Commission (NTC), rehiyon 10.

Matud pa usab ni Buenavista, kini nga gidaghanon sa mga telephone subscribers nga nagpataod sa internet nag representar sa duolan 34.68% itandi sa kinatibuk-an nga duolan setenta ka libo (69,750) ka mga telephone subscribers sa tibuok rehiyon sa maong panahon.

Nag-una sa gidaghanon sa mga internet connections mao ang Philcom nga adunay kapin 20,450 ka mga subscribers o 84.74%, nga gisundan sa Cable 21 nga adunay kapin 1,389 subscribers o 5.76% ug ICC-Bayantel nga adunay kapin 711 ka mga subscribers o 2.95%.

Gisundan kini sa PLDT, nga adunay kapin sa 629 subscribers o laing 2.61%, TMSI nga adunay kapin sa 324 ka amga subscribers o kapin sa 1.34%, ug Sotelco, nga adunay 300 ka mga subscribers o lain nga kapin sa 1%.

Misunod usab ang CruzTelco/Smart Broadband nga adunay duha ka gatus ug setenta e singko (275) ka mga subscribers o kapin usab sa 1.14%, PT&T nga adunay 35 ka subscribers o 0.15% ug Plaseco nga adunay 19 ka mga subscriber o 0.08%. (RCA-PIA10, Misamis Occidental)