Cebuano news: DepEd mihatag respeto sa katungod sa mga Filipino Muslims atol sa Ramadan

By Rutchie C. Aguhob

Sunday 19th of August 2012

OZAMIZ CITY, Misamis Occidental, Aug. 19 (PIA) -- Ang Department of Education kun DepEd ang naghatag respeto sa katungod sa mga Filipino Muslim, kinsa mi-apil sa pag puasa atol sa Ramadan gikan sa Hulyo 20 ngadto sa Agosto 18, ning tuig.

Kini ang giluwatan ni Secretary Armin Luistro sa DepEd Memorandum No. 130, nga gipagawas niadtong milabay nga Hulyo 26, tuig 2012, ngadto sa tanang schools division superintendents (SDS), diin siya miingon nga ang DepEd nagtugot sa tanang mga empleyado nga Filipino Muslim sa Central Office ug mga local offices kinsa mo-apil sa Ramdan nga mogamit sa flexible, sukad pa sa tuig 1998.

Gitugotan usab sila sa pagserbisyo, ug pagtungha sa alas siyete paingon sa alas nuybe (7:00 a.m. to 9:00 a.m.), apan dili molapas sa alas nuybe sa buntag, hangtud nga makompleto nila ang walo ka oras (8 hrs.) nga trabaho nga walay pahulay sa udto ug walay
break sa buntag ug hapon nga mokabat sa duha ka oras (2 hrs.), matag adlaw, gikan Lunes hangtud sa Biernes, matag semana sa panahon sa Ramadan.

Samtang si SDS Rebonfamil Baguio sa Ozamiz City Schools Division (OCSD) ang miingon nga ang flexible time sa mga empleyado nga Filipino Muslim ang nagseguro sa nakanunayon, ug matarong nga pagsilbe ug paghatag sa serbisyo publiko nga may kalabutan sa basic education.

Niadtong unang panahon, ang mga empleyado nga Filipino Muslim nga nagtrabaho sa local o national nga pangagamhanan sa tibuok nasud gawas sa Autonomous Region of Muslim Mindanao (ARMM) nga mo-apil sa puasa sa panahon sa Ramadan naghatag serbisyo gikan sa alas otso sa buntag paingon ngadto sa alas dose sa udto (8:00 a.m. to 12:00 noon) ug gikan sa ala una ngadto sa alas singko sa hapon (1:00 p.m. to 5:00 p.m.) isip ilang opisyal time.

Apan ang maong opisyal time nausab ngadto sa alas 7:30 sa buntag ngadto sa alas 3:30 sa hapon (7:30 a.m. to 3:30 p.m.), nga walay noon break ug nga ang diperensiya nga duha ka oras (2 hrs.) dili isipon nga undertime sa Civil Service Commission (CSC) ubos sa Paragraph 2, Resolution No. 81-8277 nga may petsa sa November 13, 1981, sumala sa Sections 2 ug 5 sa Presidential Decree No. 291 nga pinetsahan usab sa September 12, 1973, nga gi-amendahan sa Presidential Decree No. 322 nga adunay petsa sa October, 26, 1973.

Sa laiing bahin, si President Benigno S. Aquino III, sa iyang Presidential Proclamation No. 295 mideklarar sa Agosto 20, 2012, nga national holiday, agi’g hulip sa pagtak-op sa Ramadan sa Agosto 18, 2012.

Sa iyang pagpagawas sa maong proklamasyon, ang Presidente mihisgut sa Republic Act (RA) No. 9492 pinetsahan sa Huly0 24, 2007, ug giamendar sa Section 26, Chapter 7, Book I sa Executive Order (EO) No. 292, nga gitawag nga Administrative Code of 1987, miingon nga mahimong i-deklarar ang mga pista opisyal sa nasud, sa iyang kaadlawan gayud o i-sibug ngadto sa laing adlaw kung gikinahanglan.

Usab ang RA No. 9849, nagtugot nga himoong pista opisyal sa nasud ang E’dul Adha o pagtak-op sa Ramadan segun sa petsa nga mag-agad sa Islamic holidays subay sa Islamic calendar (Hijra) o sa lunar calendar nga i-agad sa Islamic astronomical calculations.

Ang maong kasayuran ang ihatag ngadto sa Presidente sa National Commission on Muslim Filipinos (NCMF) aron masuta unsang petsa and himooong pista opisyal, dugang pa ni Baguio. (PIA-Misamis Occidental)