Cebuano News: DOE-PIA mipahigayon sa multi-sectoral forum kabahin sa downstream oil industry sa Ozamiz

By Rutchie C. Aguhob

Sunday 12th of August 2012

OZAMIZ CITY, Misamis Occidental, Aug. 12 (PIA) – Usa ka Multi-Sectoral Advocacy Campaign on the Downstream Oil Industry (DOI) ang gipahigayon sa OMB-DOE kun Oil Management Bureau sa Department of Energy sa Royal Garden Hotel, Ozamiz City, kagahapong adlawa, Agosto 10.

Gihimo uban sa pakipag timbayayong sa Philippine Information Agency (PIA), ang maong kampanya gitumong sa pag mugna sa usa ka grupo sa mga tig-umol sa huna-huna, ingon man, mga tinugyanan sa media aron maoy magsilbi nga kaabag sa OMB-DOE sa pagsabwag sa kasayuran kabahin sa mga benepisyo ug uban pang mga kalambuan sa gitawag nga downstream oil industry.

Nakasentro ang katiguman sa mga hisgutanan sa Akta Republika Numero 8479 nga nagseguro sa usa ka matinud-anon nga pagbaligya sa presyo nga makarunganun ug sapat, ingon man, makanunayon nga supply aron makab-ot ang usa ka limpiyo nga palibot ug hataas nga kaledad sa produkto nga petroleum.

Gitawag usab nga “The Downstream Oil Industry Regulation Act of 1998,” ang RA 8479 nag dasig sa mga magpapatigayon nga mosulod sa negosyo kabahin sa pagbaligya sa lana sa merkado, matud pa ni Dr. Zenaida Monsada sa OMB-DOE.

Midugang si Monsada pag-ingon nga ang gitawag nga deregulation sa downstream oil industry nahimong usa ka hisgutanan nga sagad maoy hinungdan sa mga lantugi, ilsbi nsa gayud ang kabahin sa presyo sa lana ug an pagtuman sa mga estasyon sa gasoline ug mga tindahan sa Liquified Petroleum Gas (LPG) sa mga reglamento kabahin sa gidaghanon ug kalidad niini.

Ang kanunay nga pag sibug-sibug o pag usab-usab sa mga presyo sa lana sa kalibutan gumikan sa gitawag nga geo-political concerns ug espekulasyon sa kalibutanong merkado, ingon man, sa pampubliko nga pagtan-aw sa Department of Energy nga dili maka protekta sa mga konsumante batok sa mga hataas nga presyo ug batuk sa mga abusadong magpapatigayun, maoy nakapa aghat sa maong ahensiya nga magmugna ug magpatuman sa lain-laing paagi sa pag edukar o information, aron masabtan sa katawhan ang downstream oil industry.

Matud pa usab ni Monsada, sa milabay nga mga katuigan, ang Department of Energy, nakapahigayon na sa information, education and communication kun IEC, aron kadugangan sa katawhan ang ilang pagsabut unsa ang downstream oil industry, ilabi na gayud ang mga local government units, mga kapunongan sa kababayen-an, ug mga negosyante nga namaligya sa liquid petroleum products ug liquefied petroleum gas.

Apan samtang ang maong mga kampanya sa IEC ang nahimong nagmalampuson, nakit-an nga limitado lamang ang gi-abtan niini ug kadtong mga lugar nga nangayo niini, hinungdan nga ang pagtan-aw sa kadaghanan usa lamang ka reactive agency and Department of Energy o us ka ahensiya nga ayha pa lamang molihok kun aduna nay isyu batok niini, si Monsada midugang pag-ingon.

Sa pag-ila sa daku nga kaakuhan sa media aron ma-impluwensiyahan ang katawhan, ang Department of Energy ang nagmugna karon sa mga IEC program, lakip na ang nagkadaiyang grupo sa mga Communicators Networks aron madugangan ang kahibalo sa katawhan kabahin sa RA 8479, si Monsada midugang pag-ingon. (PIA-Mis. Occ.)