Cebuano News: Mga gradwado sa kurso nga Electrical Installation and Maintenance nahatagan sa NC II/kompirmasyon sa ALS

By Rutchie C. Aguhob

Tuesday 7th of August 2012

OZAMIZ CITY, Misamis Occidental, Aug. 7 (PIA) – Dise-sayes (16) ka mga mga studyante ang mi gradwar sa kurso nga Electrical Installation and Maintenance National Certificate II sa Barangay Carmen, ning siyudad, kagahapong adlawa.

Ug gihatagan kompirmasyon sa DepEd kun Department of Education, pinaagi kang Ginang Susan B. Carpio, Division Supervisor sa ALS kun Alternative Learning System sa Ozamiz City Schools Division.

Ang maong proyekto nakahan-ay sa Committee on Livelihood nga gipangulohan ni Kagawad Nelson Canumay sa Barangay Carmen sakop ning dakbayan.

Ang maong training usab gipasi-ugdahan sa TESDA kun Technical Education and Skills Development Authority diin ang trainor niini mao si Rico Sy usa ka Tesda- trainor, nga nakatapos sa NC-IV.

Nasayran nga anaay 21 ka mga estudyante sa maong training apan ang lima (5) niini wala makatungha tungod kay anaa na kini mga trabahu dire sa atong lokalidad.

Ang uban usab kanila ang naghikay na sa ilang mga papeles didto sa dakbayan sa Cagayan alang usab sa trabahu nga naghulat alang sa gawas sa nasud.

Daku ang pagpasalamat ni Barangay Kagawad Nelson Canumay uban sa tibuok pwersa sa Council sa Barangay Carmen, ingon man, sa mga trainees sa Electrical Installation and Maintenance sa nasangpit nga barangay sa dakung suporta nga gipaabot ni Ozamiz City Mayor Nova Princess Parojinog-Echavez ingon man ni ABC President Reynaldo Parojinog, Sr. ug Board Member Ricardo Parojinog.

Naobserbahan sa mensahe ang kalipay sa batan-ong mayor nga ang maong training, matod pa, maoy kahigayunan nga maminus-minusan ang mga stand-by.

Maninus-minusan pud ang kagutom, gumikan kay tungod niini ang mga trainees makakaplag na unya ug mga trabaho aron sa ingon makatabang sa tagsa-tagsa nila ka mga pamilya pinaagi na sa ilang skill kun kahanas.

Anaa usay pag-apod- apod sa mga starter kits didto sa mga trainees aron kini magamit gilayon pagsugod sa ilang panginabuhi. (PIA10-Mis. Occ.)