Cebuano news: Ozamiz migamit sa P14.135M gikan sa 20% IRA alang sa mga social/eco projects

By Rutchie C. Aguhob

Monday 6th of August 2012

OZAMIZ CITY, Misamis Occidental, Aug. 6 (PIA) -- Mikabat sa kapin P14.135 milyones nga gikuha gikan sa 20 posiyento sa IRA kun Internal Revenue Allotment sa siyudad sa Ozamiz aron gamiton alang sa mga social ug economic development projects, ni-anang pagka Hunyo 30, ning tuig.

Niini nga kantidad, kapin P2 milyones ang gigamit alang sa Barangay Comprehensive Social Development (BCSD) projects, samtang ang kapin P12.035 milyones ang gigamit alang sa Barangay Economic Development (BED) projects.

Matud pa ni Mayor Nova Princess E. Parojinog-Echavez an mga proyekto sa BCSD naglakip sa pagpa-ayo/rehabilitasyon sa multi-purpose halls aron kapasilongan sa mga OSY kun out-of-school-youths (OSYs), senior citizens, ug katong mga pamilya nga mobalwit panahon sa kalamidad.

Kini nga mga multi-purpose hall nga ayuhon sa kantidad nga tag P300,000 naglakip sa mga barangay sa Diguan, Bacolod, Lam-an, Capucao P, ug Litapan, dugan pa sa Mayor.

Lakip usab sa lista sa mga proyekto ubos sa BCSD mao ang gipalit nga lote aron tukuran sa evacuation center sa Barangay Baňadero, nga nagkantidad usab sa P300,000, the City Street Lighting Project nga nagkantidad sa P200,000 ug ang rural water system repair/rehabilitation, nga nagkantidad sa P100,000.

Samtang ang mga proyekto ubos sa Barangay Economic Development (BED) Projects, particular na ang urban/rural road links improvement ang naglakip sa pagsemento sa dalan nga adunay kapin 1.477 kilometro (km) ang gitas-on.

Kini nga mga proyekto ang nagsumpay sa nga dalan ning mosunod usab nga mga barangay: Pulot, Labinay, Kinuman Sur, San Antonio, Doña Consuelo, Embargo, Sinuza, Sangay Daku, San Roque, Carangan, Gala, Tipan - Montol Road, Gango-Labo Airport Road, and Maningcol Opol Road / Bridge.

Usa usab ka all-weather rural road maintenance nga nagkantidad sa P100,000 ang anaa sa lista sa mga BED projects, lakip nga ang balayronon alang sa Logofind kun Local Government Finance and Development project aron ipalit mga kahimanan sa konstruksyon nga nagkantidad sa P3.535 milyones.

Matud pa usab sa mayor, ang unang semestre sa amortisasyon o balayronon sa utang sa Logofind nga nagkantidad sa P1.767 milyones nabayran na ni-adtong Hunyo pa lamang. (PIA 10, Mis. Occ.)