Cebuano News: Ozamiz City midaug nga Best Component City DRRMC sa Rehiyon 10

By Rutchie C. Aguhob

Thursday 2nd of August 2012

OZAMIZ CITY, Misamis Occidental, Agosto 2 (PIA) -- Ang Ozamiz City Disaster Risk Reduction and Management Council (CDRRMC), ang nakakuha sa award nga “Best CDRRMC, Component City Category,” sa tibuok Rehiyon 10, sa milabay nga tuig 2011.

Ang Ozamiz CDRRMC ang giila sa Regional Gawad Kalasag Search for Excellence in Disaster Management Committee, tungod sa dakung nahimo niini alang sa pagpatuman sa mga mahinungdanon nga programa sa Disaster Risk Reduction and Climate Change Adaptation (DRR/CAA).

Giila usab ang Ozamiz CDRRMC sa mga kabag-ohan sa paghatag ayuda ngadto sa katawhan sa milabay nga tuig, ilabi na gayud sa aspeto sa pagpanagang ug pagpanalipud batok sa katalagman, particular na sa paghimo sa gitawag nga risk assessment, kun pagsuta sa mga kadaot nga nahimo gumikan sa kalamidad.

Si Mayor Nova Princess E. Parojinog-Echavez, Chairperson sa Ozamiz CDRRMC, ang midawat sa award gikan sa Regional DRRMC, atol sa pagtak-op sa National Disaster Consciousness Month (NDCM) nga gipahigayon didto sa Grand Caprice Convention Center sa Cagayan de Oro City, kaniadtong, Hulyo 31.

Gitunolan usab ang Mayor sa award nga nag-ila sa iyang mga supporta nga gihatag ngadto sa mga kalihokan sa RDRRMC kalabot sa kasaulogan sa bulan sa Hulyo isip 2012 NDCM ni Regional Director Ana Caňeda sa Office of Civil Defense (OCD), Region 10, kinsa mao usab ang Chairperson sa RDRRMC-10.

Ang pagsaulog sa 2012 NDCM nagtumng sa tema nga: “Ligtas na Bayan, Maunlad na Pamayanan (Luwas nga Komunidad, Mauswagon nga Komunidad).”

Samtang ang Ozamiz CDRRMC maoy mahimong representante sa rehiyon 10 didto sa National Kalasag Search for Excellence in Disaster Risk Management and Humanitarian Assistance, alang sa Best CDRRMC, Component City Category, sa tibuok nasud, matud pa usab ni Caňeda. (EOR/RCA-PIA10 Mis. Occ.)