Cebuano news: 82.55 % sa mga LGU’s sa nasud ang aduna na nay LDRRMC’s – Pnoy

By Rutchie C. Aguhob

Tuesday 31st of July 2012

OZAMIZ CITY, Misamis Occidental, Hulyo 31 (PIA) -- Mikabat na sa 1,414 ka mga LGU kun local government units ang nakabalhin na pag ngalan sa ilang mga LDCC kun Local Disaster Coordinating Council ngadto sa LDRMMC kun Local Disaster Risk Reduction and Management Councils (LDRRMC), pag-abot sa Hunyo 30, ning tuig.

Kini nga gidaghanon sa mga LDRRMC mikabat na sa duolan otsenta e tres porsento (82.55 porsento) sa kinatibuk-an nga kapin 1,713 ka mga LGU sa nasud, matud pa ni Presidente Benigno S. Aquino III, atol sa iyang SONA kun State-of-the-Nation Address nga gipahayag, bag-ohay pa lamang.

Ang pagbalhin sa ngalan nga LDCC ngadto sa LDRRMC maoy pagsanong sa Republic Act No. 10121 kun “Philippine Disaster Risk Reduction and Management Act of 2010,” matud pa sa Presidente.

Ang ngalan nga LDRRMC nagseguro sa paglakip sa disaster risk reduction and climate change adaptation (DRR/CCA) diha sa mga Local Development Plan, programs and budgets sa mga kagamhanang loka, miingon ang Presidente.

Matud pa usab sa Presidente, ang gidaghanon sa mga LGU kun local government units nga nakabalhin na sa ngalan ngadto sa LDRRMC’s, mikabat na sa 63 ka mga probinsiya, 97 ka mga siyudad ug kapin sa 1,015 ka mga lungsod.

Usab, duolan na sa siyam ka libo (8,503) o kapin 20.23 porsento sa kinatibuk-an nga kapin kwarenta e dos ka libo (42,026) ka mga barangay sa nasud ang naka organisar na sa ilang mga Barangay DRRMC ug nga ang duolan tulo ka libo (2,739) kanila o duolan siyete porsento kanila, aduna nay gihimo nga BDRRMC Plan, dugang sa Presidente.

Samtang sa siyudad sa Ozamiz, ang pagbag-o sa hazard/vulnerability ug resource capacity maps sa 51 niini ka barangay subay sa mga datus sa ubang opisina sa gobyerno ang nag-una sa listahan sa plano sa CDRRMC.

Matud pa ni Mark Vincent Israel, Officer-in-Charge, Emergency Operations Center ug Leader sa City Emergency Response Team ang CDRRMC usab nagplano nga mananum sa mga punoan sa kahoy alang sa watershed watershed aron kapalipdan ang pagdahili sa yuta gikan sa mga bungtod.

Lain nga plano usab sa CDRRMC mao ang pag bag-o sa mga zoning ordinances ug mga safety regulations ug paglakip niini diha sa mga kalihokan sa DRRMC sa mga development plans ug paglukat insurance alang sa mga butang sa gobyerno aron kini mabayaran panaglit madaut gumikan sa kalamidad.

Plano usab sa CDRRMC nga himoong lig-on ug aktibo ang mga Barangay DRRMC ug pagmugna sa mga BDRRMC Operations Center, ug pagpahigayon niining mosunod nga mga pagbansay-bansay alang sa mga membro sa CDRRMC: Incident Command System, Damage and Needs Assessment (DANA), Pre-Hospital Emergencies, Ropemanship, Water Search and Rescue, Medical First Responders, Emergency Medical Technician and Ambulance Operations.

Ang mga kalihokan ubos sa Response Component sa maong plano naglakip usab sa pagmugna sa Early Warning Communications aron makahimo usa ka early warning system alang sa 51 ka mga barangay sa siyudad.

Kalakip usab sa plano ang pagmugna sa usa ka grupo sa mga tawo nga maoy mohimo sa damage assessment needs analysis sa panahon sa kalamidad, dugang ni Israel. (EOR/RCA-PIA10 Mis. Occ.)