Cebuano news: Ozamiz disaster council mipaling-on pa sa kahibalo aron kalikayan ang peligro sa kalamidad

By Rutchie C. Aguhob

Monday 23rd of July 2012

OZAMIZ CITY, Misamis Occidental, Hulyo 23 (PIA) –- Gihingusgan karon sa CDRRMC kun City Disaster Risk Reduction and Management Council sa siyudad sa Ozamiz ang kampanya pagpalapad sa kahibalo sa katawhan aron kalikayan ang kapeligro sa mga kalamidad.

Kining maong kampanya gitumong aron mapalig-on ug madugangan ang kina-adman sa katawhan kabahin sa nagka daiyang katalagman atol sa pag saulog sa NDCM kun National Disaster Consciousness Month, ning bulan sa Hulyo, matud pa ni Mark Vincent Israel, Officer-in-charge sa Emergency Operations Center sa siyudad.

Dugang katuyoan niini mao ang paghatag sa kahigayonan ngadto sa katawhan aron mapun-an ang ilang pagsabot sa kamahinungdanon ug kahanas aron matuman ang tinguha sa “zero casualty” atol unya sa mga katalagman, dugang ni Israel, kinsa mao usab ang Leader sa City Emergency Response Team.

Gitumong sa tema nga “Ligtas na Bayan, Maunlad na Pamayanan, (Luwas nga Komunidad, Mabungahong Komunidad),” ang mga kalihokan sulod sa bulan naglangkob sa paghimo sa mga NDCM exhibits, pagpanghatag mga basahon kabahin sa nagka daiyang mga kalamidad ug unsay buhaton kung kini mahitabo gayud diha sa ilang mga dapit.

Target niini nga kampanya ang tanang tawo sa komunidad, mga bolunter, mga barangay lider, mga estudyante, mga magtutudlo ug uban pang trabahante ning mosunod nga mga eskwelahan:

Ozamiz City School of Arts and Trade (OCSAT), Our Lady of Triumph School (OLTS), Ozamiz City Central School (OCCS), Ozamiz City National High School (OCNHS), Pulot NHS ug Labinay NHS.

Lakip usab sa NDCM month-long activities mao kining mosunod nga kalihokan: Community-Based Disaster Risk Management for COSE, Inc. sa Barangay Baňadero, Hulyo 21-22, BLST kun Basic Life Support Training sa Montol ug Labo National High School, ug Embargo Elementary School sa Hulyo 27.

Community Flood Evacuation Drill isa Barangay Calabayan, Baňadero ug Lam-an, ingon man oratorical, poster-making ug essay-writing contest sa Misamis University (MU), Huly 25 ug disaster preparedness training alang sa mga BSP kun Boy Scouts of the Philippines (BSP), Hulyo 28 ug 29.

Pagpirma sa memorandum of agreement (MOA) tali sa Ozamiz City ug mga pipila ka mga tindahan, parmasya, gasolinahan ug mga puneraria aron hatagan sa konsiderasyon nga makapalit sa tambal o serbisyo sa mubo nga presyo o pa-utang panahon sa kalamidad, Huly 30 ug pagpananum sa kahoy, Hulyo 31.

Matud pa ni Israel, usa ka semana sa wala pa magsugod ang NDCM, nagbitay na sa mga pahibalo ang mga eskwelahan, mga opisina sa gobyerno ug uban pang mga dapit nga adunay daghan nga katawhan diin nakasulat ang tema kabahin sa selebrasyon.

Usa usab ka misa alang sa mga kalag sa nangamatay sa kalamidad, natural man o tinuyo ang gipahigayon kaniadtong Hulyo 2, nga gisundan sa usa ka motorcade paingon sa City Hall diin gilunsad ang celebrasyon. (PIA 10, Mis. Occ.)