Cebuano news: DA mitunol sa 2 ka proyekto sa agrikultura ngadto sa Oroquieta

By Rutchie C. Aguhob

Sunday 15th of July 2012

OROQUIETA CITY, Misamis Occidental, Hulyo 15 (PIA) -- Duha ka proyekto sa agrikultura nga P2.7 milyon ang gitunol sa DA kun Department of Agriculture-Regional Field Unit 10 ngadto sa siyudad sa Oroquieta, bag-ohay pa lamang.

Kining maong mga proyekto naglangkob sa paghimo sa FMR kun farm-to-market road nga magkutay sa Barangay Lower Rizal ngadto sa Tuyabang Alto nga nagkantidad sa P1.5 milyon, ingon man ang pagtukod Agricultural Packing Center sa Barangay Canubay.

Samtang si Mayor Jose Almonte, atol sa turn-over ceremony, mingon nga adunay gitahan ang siyudad isip counterpart, alang sa maong mga proyekto.

Matud pa niya, ang tubag sa dakung panginahanglanon sa katawhan alang sa imprastraktura ug mga kahimanan nga kabutangan aron mahipos ang ilang produkto human sa ting-ani.

Laing nga proyekto usab, sama sa pagpanghatag mga liso nga igtatanum ang gitinguha sa siyudad isip usa ka component project sa mga kabarangayan sa siuyudad, dugang sa mayor.

Adunay tinguha usab ang siyudad sa pag angkon ug mga bag-ong kahimanan ug makinarya sa panguma, aron mapalambo ang mga proyekto sa sector sa agrikultura, si Mayor Almonte miingon.

Gipasabot usab sa Mayor nga ang Agricultural Packing Center maony magsilbi nga food terminal kun bagsakan sa mga preskong prutas ug utanaon ug uban ang produkto gikan sa umahan, diin didto timbanong, pili-on ug tinu-on ug segurohon nga kini luwas kan-on ug ibaligya sa kamerkadohan sa mga silingan mga lugar.

Lakip sa mitambong sa maong kalihokan mao ang mga opisyales sa barangay, mga pangulo sa mga opisina sa city government ug mga membro sa Sagguniang Panglungsod (SP) nga gipangulohan ni Bise Mayor Harry Guantero.

Mitambong usab si Corazon Balabat, DA RFU-10 focal person on Food Terminal Projects, kinsa uban kang Mayor Almonte, ang nanguna sa ribbon-cutting atol sa maong okasyon. (CIO/PIA 10, Mis. Occ.)