Cebuano News: Pest Management nagpasidaan sa mga mag-uuma sa lubi kabahin sa Brontispa pest

By Rutchie C. Aguhob

Thursday 5th of July 2012

OROQUIETA CITY, Misamis Occidental, July 5 (PIA) – Lain nga dangan sa tanum ang gikataho sa Integrated Pest Management sa Department of Agriculture kun IPM-DA nga posibleng moabot sa Misamis Occidental.

Kini nga dangan ang gitawag nga Brontispa ug nagpasidaan na usab ang IPM-DA nga kinahanglang magbantay niini nga insekto nga gikatuohang nagpadulong sa probinsya sa Misamis Ocidental nga posibleng modaot sa industriya sa lubi niini.

Matud pa ni Dr. Jesus Binamira, IPM-DA National Officer nga kini ang ilang gikabalak-an pag-ayo labina dinhi sa probinsya nga maabtan sa maong dangan labina nga ang industriya sa lubi maoy nag-unang panginabuhian sa katawhan dinhi sa probinsya.

Human miabot ang maong dangan sa nasud, miabot na ug 1.6 Million ka mga punoan sa lubi ang nabiktima niini, si Binamira miingon.

Niining bag-o lamang adunay nakit-an nga kaso sa Zamboang del Sur partikular sa Pagadian City ug dili layo ang kahigayonan nga moabot usab kini sa probinsya gumikan sa kaduol ra niini.

Hinuon adunay gihimong remedy karon ang IPM nga mabatokan ang maong dangan pinaagi sa biological control diin mangita og laing insekto ang mga eksperto nga maoy makig-away sa mihugpa nga dangan.

Sa pagkakaron kamulo na kining gihimo sa Philippine Coconut Authority-Research Center nga nakabasi sa Davao City.

Bag-ohay pa lamang usab nga nakadisobre ang IPM-DA sa dangan sa humay nga gitawag ug Rice Green Bulk ug nga gipasidan-an usab niini ang mga mag-uuma sa humay dinhi sa probinsiyaay. (PIO/PIA-10 Mis. Occ.)