Cebuano news: Unang Provincial Rubber Industry Forum sa Mis. Occ. gipahigayon sa DA ug DTI

By Pat Nano

Sunday 24th of June 2012

OROQUIETA CITY, Misamis Occidental, Hunyo 24 (PIA) -- Nagkatigum ang mga mag-uuma ug mga farm technician sa goma sa probinsiya Misamis Occidental alang sa 1st Provincial Rubber Industry Forum, bag-ohay pa lamang.

Gipaluyohan sa DA kun Department of Agriculture sa pagtimbayayong sa DTI kun Department of Trade and Industry, ang maong katiguman gitumong sa pagpalambo sa rubber industry sa Misamis Occidental.

Tuyo usab sa maong panagtigum nga kahatagan ang mga Rubber Growers ug mga technicians sa mga kasayuran ug uban pang impormasyon alang sa pagpalambo sa industriya sa goma o rubbe, ning probinsiya.

Nasayran nga ang DA ug DTI ang magka-alayon karon alang sa pagpalambo sa komersyo sa natad sa agrikultura dinhi sa probinsya, ilabi na karon sa programa sa pagpananom sa rubber.

Kung ang DA ang naghatag sa mga kalamboan sa pagpanguma ngadto sa mga mag-uuma, ang buhatan usab sa DTI ang nagtabang sa mga mag-uuma sa pagdala ngadto sa merkado o pagbaligya sa ilang mga naaning produkto, ug usa na niini ang produkto nga duga nga goma gikan sa kahoy.

Mahinumduman nga ang Probinsya sa Misamis Occidental ang aduna karo’y plano sa pagpalambo sa Rubber Tree Farming, sama sa ubang mga probinsya sa Zamboanga Sibugay.

Kini tungod kay haum ug dako kining potensyal sa probinsya nga makatabang sa ekonomiya ug sa panginabuhian sa mga Misamisnon, ilabi na usab sa proteksyon sa kinaiyahan uban sa lain pa nga mga tanum sa kabukiran.

Sa maong panagtigun usab natukod ang pinakaunang Provincial Rubber Growers Association sa Misamis Occidental.
Kini human makapili sa mosunod nga mga opisyales ang mga Rubber Growers sa tibook probinsya atol sa pagpahigayon sa 1st Provincial Rubber Industry Forum: Dr. Arthur Ananoria nga taga-Ororquieta City isip Federated President, Dra. Ellen Galon nga taga- lungsod sa Aloran, Vice President ug Remedios Pagasian nga taga-lungsod sa Sapang Dalaga, Secretary; Lilia Beniga nga taga- lungsod sa Jimenez, Treasurer, Danilo Sayre nga taga- lungsod sa Calamba, Auditor ug sila si Ricardo Intog ug Natalio Paigan nga taga-lungsod sa Tudela, mga P.R.O. ug kanhi Bise Gobernador Francisco Paylaga, Adviser.

Kini nga asosasyon gimugna aron adunay mga mamahimong kaabag ang buhatan sa DA ug DTI alang sa hingpit nga implementasyon sa mga proyekto ug programa sa pagpananom sa rubber.

Gilauman nga pinaagi sa namugnang asosasyon kahatagan sa kasayon ang mga Rubber Growers sa tibook probinsya nga maka avail o makakuha sa mga proyekto ug mga programa alang sa Rubber Farming ug usab makahatag sa dugang mga kasayuran kabahin niini. (PIO/PIA10, Mis. Occ.)